ORANJESTAD (AAN): Fundashon Stimami Sterilisami ta expresa su profundo gradicimento pa e sosten continuo di One Love Foundation,
incluyendo su donacion generoso reciente di $8.000. Total 100% di e fondonan aporta na Stimami Sterilisami ta wordo usa pa cubri e costo di sterilisacion di cacho of pushi registra via nan programa nacional, cual ta cubri 100% di e costo di e procedura na e veterinarionan participante den su campaña nacional y ta inclui anestesia, medicamento y un microchip. E suma di One Love lo wordo compensa cu un suma igual Florin pa Florin pa Bucuti & Tara Beach Resort, cu tambe ta sirbi como un sostenedo generoso y e fundador di Stimami Sterilisami.
E mision di One Love Foundation, un fundacion estableci na Merca, ta pa genera fondo for di exterior, amplia comprension, y educa hende tocante e necesidad urgente di bienestar animal na Aruba. E fundacion a forma un alianza cu Stimami Sterilisami den December 2021, reconociendo e importancia di un control humano di populacion pa reduci e cantidad di animal riba caya y mehora nan salud y calidad di bida.
For di 2016, Stimami Sterilisami a subsidia casi 47,000 sterilisacion. E esfuerso aki no solamente ta yuda reduci e cantidad di animalnan riba caya, sino tambe ta mehora nan salud y calidad di bida. E exito continuo di e mision ta depende fuertemente riba e sosten di donantenan generoso manera One Love Foundation, Bucuti & Tara Beach Resort, Aruba Tourism Authority, Tourism Product Enhancement Fund, Setar N.V., y hopi otro. Sin nan contribucion, e trabao vital aki no por sigui.
“Nos ta profundamente agradecido pa e apoyo extraordinario di One Love Foundation, cual su compromiso cu nos causa ta sinceramente inspirante,” Ewald Biemans, Presidente di Fundashon Stimami Sterilisami ta comenta. “E ta inspirante pa wak cu un fundacion basa na merca y su miembronan ta traha asina duro pa recauda fondo pa nos animalnan, demonstrando e amor cu nan tin pa nos isla cu nan accionnan, creando un impacto real y duradero den nos comunidad.”
Motiva pa pasion y determinacion, One Love Foundation, Bucuti & Tara y Stimami Sterilisami ta uni den nan compromiso pa sigui fortalece e bienestar di animal na Aruba. Keda pendiente, pasobra den poco nos lo lansa nos prome evento di foam party pa recauda fondo - un iniciativa dinamico cu ta uni e comunidad mientras ta respaldando un causa cu gran balor social.
Pa mas detaye, pa involucra bo mes, of pa contribui cu un donacion, por bishita stimamisterilisami.com. Pa contribui na e causa, donacionnan por wordo haci via transferencia bancario pa Fundacion Stimami Sterilisami, via Aruba Bank, cu number di cuenta: 6012630190.
