ORANJESTAD (AAN): Den su discurso di Fin di Aña 2025–2026, e Prome Minister di Aruba, mr. Mike Eman a invita pueblo Arubiano pa un
momento di reflexion profundo riba pasado, presente y futuro di nos pais. E mensahe, presenta for di e historico Bestuurskantoor y finalisa den e sala nobo di Conseho di Ministro, a destaca continuidad di liderazgo, servicio y responsabilidad nacional
Den su palabra, e Prome Minister a subraya e significado historico di Status Aparte, cu lo celebra 40 aña na 2026, y e 50 aña di nos Himno y Bandera como simbolonan bibo di identidad, unidad y compromiso cu Aruba. El a enfatisa cu Status Aparte a crea e vehiculo constitucional pa Aruba por a traha riba e bon comun pa henter e pueblo. Esaki ta haci cu Status Aaprte ta un responsabilidad continuo pa sigui traha riba un miho mañan.
“Status Aparte ta un responsabilidad diario pa crea un mañan nobo,” el a expresa durante e discurso
Un parti central di e discurso tabata e principio di e Bon Comun, como guia fundamental di gobierno. Basa riba pensamento di su abuelo, Henny Eman, e Prome Minister a recalca cu prosperidad cu ta wordo duna na Aruba mester wordo comparti di manera husto. E a referi na e discurso di su abuelo ya na 1929, mustrando riba locual nos haya na prosperidad mester wordo mira como cu a bin di “de Hand der Voorzienigheid”. Locual bini for di Man di Providencia mester wordo hustamente comparti cu e pueblo, e abuelo di Promer Minister a bringa p’e durante su carera como vocero di e Pueblo di Aruba.
“Loke ta wordo duna na Aruba mester beneficia tur; cu ningun hende no ta invisibel y cu ningun bario no ta lubida,” el a declara siguiendo e pensamen di e ‘Man di Providencia’ cu su abuelo a para p’e, asina Promer Minister Eman a conecta principio moral cu accion concreto di gobierno.
Den e marco aki, e Prome Minister Eman a anuncia tambe cu na fin di Januari lo wordo organiza na Aruba un conferencia internacional rond di e tema The Common Good. (Bon Comun). Na e conferencia aki lo participa personanan prominente for di mundo academico, circulonan religioso, organizacionnan no gubernamental y politica internacional. Cu e encuentro aki, Aruba kier ofrece un plataforma pa reflexion global riba responsabilidad, solidaridad y desaroyo husto, y na mes momento posiciona su propio vision riba e Bon Comun na nivel internacional.”
E Prome Minister a detaya iniciativa clave cu gobierno a cuminsa na 2025 y cu lo continua na 2026, entre otro apoyo pa mayornan, aumento di pensioen, restauracion di cubrimento completo di medicina, presencia semanal di gobierno den barionan, y un agenda fuerte pa oportunidad economico y sostenibilidad ambiental.
Mirando padilanti, e discurso a presenta un vision pa un Aruba mas fuerte y mas equitativo, incluyendo reforma fiscal pa promove inversion, rescate di scolnan, revitalisacion di San Nicolas, transformacion di e area di refineria, y un cambio di rumbo den turismo for di cantidad pa calidad. El a subraya cu gobierno ta mira crecemiento economico y bienestar social como dos caminda cu mester cana hunto.
Den contexto di tension internacional, e Prome Minister a reafirma cu Aruba ta traha estrechamente cu Reino di Hulanda y su partnernan pa garantisa siguridad y stabilidad. El a comparti un mensahe di Fe y speranza citando Isaias 51:5, recordando cu “riba Mi e islanan lo warda, y riba Mi brasa nan lo pone nan speranza”
Finalmente, e discurso a dedica un momento special na memoria di e difunto Prome Minister Henny Eman, reconociendo su rol historico y expresando solidaridad cu tur ciudadano cu a pasa pa perdida y dolor durante e aña.
“Dolor ta conecta nos, pero amor tambe. E caminda di e Bon Comun cu Henny a scoge ta e caminda cu nos ta sigui,” el a bisa den un mensahe carga di emocion recordando su ruman cu a fayece 6 di januari 2025.
E discurso a cera cu un yamada na union, gratitud y confianza den futuro di Aruba, reafirmando un tema nacional: “Aruba ta di nos tur.”
