Dr. Yuri Casseres: --- *Omicron ta caba e variante dominante aki na Aruba --- *Delta ta mas den pulmon y pesey tabata mas severo
ORANJESTAD (AAN): Pakico e variante di Covid-19, esta omicron ta mas contagioso? Dr. Yuri Casseres di Dr. Horacio Oduber Hospital a splica cu omicron ta mas contagioso pasobra e ta mas den e sistema respiratorio superior (upper respiratory tract); nanishi y garganta.
E variante delta tabata mas den e pulmonnan y pesey ta haya cu den caso di Delta e ta mas severo tambe.
Dr. Casseres a remarca cu door di omicron ta ariba den nanishi, bo ta propaga e virus mas lihe. Un di e cosnan cu por evita e contagio ta limita e contactonan, uza tapaboca pasobra asina por toch baha e cantidad di casonan.
Tur e medidanan cu Crisis Team a tuma lo bay yuda esey, pero "nos mes tambe tin cu yuda nos mes, di limita tur e contactonan, sigur aworaki den e dianan di fiesta", e medico a enfatisa.
El a laga sa cu pa e fin di siman aki, apesar cu e situacion ta bao control na Hospital, ta spera di tin mas claridad riba con omicron na Aruba lo bay comporta su mes door cu e casonan ta subiendo y un porcentahe di e casonan aki lo yega na Hospital, Casseres a duna di conoce.
Aworaki tin cosnan cu ainda no tin mucho claridad riba nan riba omicron. Na Aruba tambe ta haciendo analisisnan pa haya sa mas con omicron ta comporta. Poco poco ta bay haya sa mas di omicron.
Omicron ta e variante dominante aki na Aruba caba. Esey kiermen cu Delta ta bay bira menos y si omicron sigui asina e lo yega na un porcentahe hopi halto, Dr. Yuri Casseres a subraya.
