Cambio den maneho di isolacion y cuarentena
ORANJESTAD (AAN): Bo tin Covid-19? Awor bo mester isola bo mes djis pa 5 dia so, cu algun excepcion. Esey ta informacion cu Crisis Team a suministra Diahuebs anochi na Aruba.
Segun Crisis Team, despues di amplio consideracion di e diferente conseho y analysisnan a dicidi pa trece cambio den maneho di Isolacion y Cuarentena.
Na momento cu un persona haya un resultado positivo di un test pa SARS-CoV-2, e persona mester isola su mes pa 5 dia y evita contacto directo cu demas persona den cas. Su dianan di isolacion ta cuminsa conta for di e dia cu e haya su resultado positivo.
Si despues di 5 dia e persona ainda tin sintoma relata na Covid-19, e persona mester mantene su mes den isolacion te ora cu e no ta sinti sintomanan mas. Mester yena e formulario cu a ricibi den bo email na momento cu bo completa 24 ora sin sintoma.
Tur esnan cu ta biba cu e persona den cas mester bay den cuarentena pa 5 dia cuminsando for di e dia di ultimo contacto cu e persona positivo y nan mester uza tapaboca den cas na tur momento. E persona infecta tin e responsabilidad di informa esnan cu ta biba cu ne den e cas di esaki.
E protocol isolacion y cuarentena ta inclui den e email cu ta ser manda pa e persona positivo. Tene cuenta cu Departamento di Salud Publico no lo tuma contacto cu bo ni cu esnan cu ta biba cubo den e cas.
Crisis Team ta pidi esnan contagia, pa encarecidamente pa uza e formulario cu bo ricibi den bo email pa manda nan e informacion di tur esnan cu ta biba cubo den cas cu mester bay den cuarentena.
