Olivia Figaroa a emprende su buelo na e Cas Celestial cerca Dios Tata

El a cuminsa su buelo na Cas Celestial cerca Dios Tata

ORANJESTAD (AAN) -- Un noticia cu sigur a causa gran tristeza y sorpresa, cerca hopi hende den comunidad, ta cu Olivia Figaroa a caba di cuminsa su buelo pa bay biba na e Cas Celestial cerca Dios Tata. Olivia a sirbi comunidad pa casi 40 aña, como Bibliotecaria, na Biblioteca Nacional Aruba.

   Olivia Virginia Jacinta Figaroa a nace dia 13 di September 1957 y ta un dama hopi keri, aprecia y respeta pa su famia, amigo- y coleganan.  E ta yiu muher di e gran estadista Frans Figaroa.  E tabata hopi aprecia cu clientenan di Biblioteca, entre nan studiantenan cu el a sa di yuda masha bon mes, durante nan bishitanan pa busca informacion, prepara pa proyecto, CP of Examen.  Esey ta bin danki na su profesionalismo como bibliotecaria hubenil.

   Olivia a studia y gradua na 1980 na Bibliotheek- en Documentatieacademie Tilburg na Hulanda.  For di October 1980 te cu November 1983 el a labora como Bibliotecaria Hubenil y Infantil pa PBC Noord Brabant na Hulanda.  Desde 30 di November 1983 el a cuminsa traha como Bibliotecaria Hubenil na Aruba.  El a baha cu pensioen na 2022.

   Olivia, un persona di berdad bunita, no solamente fisicamente pero como ser humano. Amable, simpatico, sonriente, atento, inteligente, cu su miho disponibilidad pa duna informacion y yuda e cliente na e manera mas completo posible. Un dama cu hopi empatia y carisma cu sigur ta laga un bashi den su famia y amistadnan, y den e gremio di lectornan.

Tambe cu prensa e tabata hopi dispuesto pa duna informacion tocante diferente actividad cu tabata tuma lugar na Biblioteca, manera charla, exposicion, eventonan pa mucha durante nan vacacion grandi, durante e Siman di Buki pa mucha, of ora tabata tin actividad pa festeha fechanan nacional.

Poco despues cu e periodo di pandemia a pasa y cu poco, poco, Aruba a bolbe na normalidad, Olivia Figaroa a bishita redaccion di DIARIO pa un entrevista relaciona cu añanan di servicio unda el a rebela cu poco tempo despues e lo a baha cu pensioen y por corda bon con e tabata tin palabranan di gradicimento na su coleganan di BNA, cu cuanto cariño el a referi na su trabao. Y claro, el a conta nos tocante su felicidad di mas grandi, cu ta su yiu (Agni) y con el a maneha su tempo pa su trabao y pa su tarea asina importante como mama.

   Olivia a fungi tambe como Vice-President di Organisacion OPPA cu ta atende e pensionadonan di gobierno.  Olivia tin 66 aña di edad.

   DIARIO ta extende su sincero condolencia y hopi forza na Olivia su yiu, henter su famia, coleganan cu ken el a traha na BNA y tambe esnan cu kendenan el a comparti den diferente organizacion, entre otro UNOCA. Na tur su bon amistadnan y tur hende cu a conoce su persona y a stime. Cu Olivia sosega den braza di Señor.