Ocho club di servicio a uni pa un proyecto grandi na Ambiente Feliz

E ta Diasabra 25 di Mei venidero

• Un biaha mas clubnan local aki a uni cu un solo meta 

ORANJESTAD (AAN): Un noticia sumamente alentador y cu ta trece confiansa bek den humanidad, ta loke ocho club local a anuncia Diahuebs mainta durante un conferencia di prensa.  A toca honor na Rubin Ponson pa anuncia cu Kiwanis Club of Aruba, Kiwanis Club of Palm Beach, Kiwanis Club San Nicolas, Rotary Club Aruba, Aruba One Happy Island Lions Club, Quota Club Aruba, Aruba Lions Club, Women’s Club of Aruba a uni nan esfuerso na beneficio di un solo proyecto.

   Segun Ponson, ta desde aña pasa caba nan ta trahando riba e proyecto aki, y no a divulge na publico prome.  Pasobra na diferente ocasion, e proyecto a cambia un poco.  Pero awor si ta cla pa lansa esaki oficialmente na pueblo.

   Ocho club di servicio social na Aruba a dicidi pa hunto nan haci un proyecto, pa asina demostra na comunidad loke ta e trabao di clubnan cu ta haci trabao boluntario.  Tur ocho club lo pone nan miembronan disponibel riba un solo dia pa haci trabao na Stichting Ambiente Feliz na Santa Cruz.

   Ambiente Feliz a bira esun cu ta bay haya den 2024 e trabao conhunto di 8 club pareu pa ehecuta riba Diasabra 25 di Mei venidero.  Lo bay haci diferente trabao cu nan tin mester di dje na nan edificio, e.o. haci reparacion riba edificio, drecha algun cos cu nan mester eynan.  Riba e dia aki tambe lo bay entretene e clientenan di Ambiente Feliz, unda lo saca nan den un Bus y hiba nan pa un tour di mitar dia.  Di e forma ey e edificio ta liber pa haya e trabao necesario wordo ehecuta.

   Ponson a indica cu e idea aki a cuminsa ya for di algun tempo, ora cu e lidernan di diferente club local tabata topa otro, y a realiza ta cuanto club di servicio tin riba e isla, y cu ta sigur cu ta clubnan di hopi aña yudando Aruba, haciendo trabaonan cu ya tin e “nomber” den comunidad.  Y awor ta bunita pa mira tur club ta uni, pa haci un trabao balioso na comunidad.

   “Uni ta forza, y esey lo bay ta loke e ocho clubnan aki lo demostra tambe cu hopi miembro hunto ta haci e trabao,” Ponson a indica.  El a agrega cu cada club individual ta contribuyendo cu un suma di placa cu nan lo bay haci donacion.  E donacion aki lo cubri e gastonan cu lo bay tin na e proyecto, y cierto di e gastonan aki lo wordo cubri pa patrocinadornan.

   Ponson a splica cu esaki no ta prome biaha cu clubnan di servicio na Aruba ta uni pa pone man na obra.  El a compronde cu hopi aña pasa a yega di haci algo similar riba e isla.  Pero a tuma basta tempo pa awor na 2024 por regresa cu algo similar, na beneficio di comunidad.

   A haya sa cu ta hopi reunion a ser teni caba riba e proyecto di Ambiente Feliz, y cada biaha por sinti cu e interes di cada club y nan miembronan ta hopi grandi pa haci e trabaonan aki en conhunto.  Fuera di topa coleganan di otro clubnan di servicio, e Diasabra ey lo bay ta un chens unico pa e decenas di miembronan topa otro y hunto pone man na obra pa yuda den e proyecto.

   Ponson a splica cu e miembronan di e 8 club mes lo ta man na obra e dia aki, sinembargo si acaso tin mas boluntario cu kier bay yuda, nan por acudi na Ambiente Feliz riba 25 di Mei pa duna un man.

   Nan a hasta traha un Shirt special pa e ocasion aki cu tur e miembronan di clubnan lo bay bisti pa haci e bunita proyecto aki pa comunidad.  Clubnan semper ta keda depende di comunidad pa sigui haya nan fondonan, y pa por haci e tipo di proyectonan asina tambe.

   Esnan presente tabata Rubin Ponson di Aruba Lions Club, Karla Martinus di Aruba One Happy Island Lions Club, Luis Oduber di Rotary Club of Aruba, Stella Monsanto di Quota Club, Reina Geerman di Women’s Club of Aruba, Onasito Giel di Kiwanis Club of Palm Beach, y Giandra de Cuba di Kiwanis Club of San Nicolas.