GM di Impact Hub Aruba, Mary-Ann Falconi-Rasmijn:
*E programa a wordo crea pa ta uno sostenibel
ORANJESTAD (AAN): Diasabra proximo, 24 di Augustus, lo celebra e 200 añanan di Oranjestad y den cuadro di esaki a combersa cu Mary-Ann Falconi-Rasmijn, General Manager di Impact Hub Aruba, cu ta e iniciado di e proyecto 'O'stad200 Incubator'.
El a bisa cu esaki ta un bon momento pa wak bek ya cu Stichting Rancho a bin cu e iniciativa di Oranjestad 200 y den e caso aki, Impact Hub Aruba kier a wak e celebracion aki tambe for di e banda di comercio.
Kier a wak bek con comercio di Oranjestad a desaroya y con e ta aworaki y unda kier bay. Hunto cu esey, a bisa, e parti creativo ta un aspecto cu Impact Hub Aruba ta sostene, pero Oranjestad 200 den su contexto di desaroyo economico ta hopi importante, a bisa.
Tin hopi proyecto individual bao di e capa di Oranjestad 200 cu lo conta e historia di e parti di arkitectura, su hendenan, y Impact Hub kier a wak con por sigui pa e generacion nobo cu ta esunnan cu ta creando nan compania y den ki direccion por hiba Oranjestad y Aruba en general.
Falconi-Rasmijn a splica cu pensando den e cuadro aki, Impact Hub Aruba tin un MoU (Memorandum of Understanding) conhuntamente cu Minister di Asuntonan Economico, Sr. Geoffrey Wever, Camara di Comercio y Universidad di Aruba. Pa cu esaki, e aña aki a dicidi cu ta bay continua cu e MoU aki. Door cu Impact Hub ta un organisacion cu ta conecta globalmente a desaroya un 'Incubator' basa riba modelonan conoci internacionalmente y a adapt'e pa Aruba, a indica.
Asina a bin cu 'O'stad 200 Incubator' pa conmemora 200 aña di desaroyo economico di Oranjestad, pero aworaki cu mira pa futuro. El a laga sa cu cada organisacion partner den e incubator tin nan rol. A remarca cu partnernan tin hopi luna trahando riba e proyecto, riba kico ta e materianan relevante, pero tambe con ta yega na fondo pa cubri tur gastonan.
Hopi hende ta pensa cu pa haci algo di e magnitud aki ta facil, pero no ta facil. Ta trahando cu mas di 30 facilitado local, 20 mentor pa un total di 50 profesional cu ta contribuyendo na e iniciativa aki. A logra unifica e grupo aki cu ta representa varios sector cu ta hopi decisivo pa e tipo di desaroyonan aki, e GM di Impact Hub Aruba a duna di conoce.
'O'stad 200 Incubator' aworaki tin 23 participante. For di nan 4 ta 'scale-ups' y 19 ta 'start-ups'.
E programa aki a wordo crea pa ta uno sostenibel como tambe eficiente y ta bay keda ripiti otro añanan, Mary-Ann Falconi-Rasmijn a anuncia.
El a finalisa bisando cu Impact Hub Aruba ta trahando a base di e SDG's (Sustainable Development Goals) pa crea empleo, pa innova, pa duna tur hende un oportunidad igual di participa.
Mester agrega cu e 'final pitch' di O'stad200 Incubator' lo ta dia 2 di November. Mientrastanto, ta preparando pa un evento grandi cu lo ta e 'O'stad200 Incubator Summit' cu ta un evento habri pa publico y unda lo trata topiconan manera 'Digitalization', 'Cyber security', 'Fintech', 'Machine Learning' y 'Artificial Intelligence'.
Lo tin 'top speakers', entre nan un representante di Google. E evento aki lo ta dia 14 di september proximo.
