Dr. Jayburtt Dijkhoff:
*Si haci un rapport e lo ta un 'dekking onvoldoende'
ORANJESTAD (AAN) – Siguiendo cu e panorama politico presenta pa Dr. Jayburtt Dijkhoff, director di Fundacion SIKI (Stichting Instituut voor Kennis en Innovatie), durante un conferencia di prensa, di lanzamento di su curso “Con pa goberna un pais”, el a comenta tambe cu e rapport di Aruba Reken Kamer ta papia di “stempel parliament”.
Esaki ta nifica cu nos pueblo ta vota supuestamente pa elegi Parlamento, pero den practica nos ta vota pa e ministernan, nan ta “schuif door” bay den Gobierno, y esnan cu no tin e voto democratico ta bay representa pueblo.
“Esaki ta crea un nepotismo structural, na unda no ta vota na interes general, na prome lugar, pero si ta vota pa interes di un ideologia. Y esey a hiba na varios consecuencia negativo.
“E ministernan mes, hopi biaha no ta mantene nan mes na tur e reglanan y hopi biaha no tin e conocimento di e Estado di Derecho, manera mester ta; y no ta traha tampoco como un gobierno pa e interes di nos pueblo”, Jayburtt Dijkhoff a señala.
Por ultimo, e Derechonan Humano te ainda no a saca ningun rapport pa Aruba den su totalidad, pasobra si lo saca e rapport ey e lo ta un “dekking onvoldoende”, segun Jayburtt Dijkhoff.
“Nos tin un violacion extremadamente grandi di varios derecho humano, y esey ta haci cu nos no ta bayendo den un direccion caminda tin igualdad, na unda nos ta bataya contra discriminacion, unda nos ta purba di hiba na un sociedad husto, y inclusivo pa tur hende”, Jayburtt a señala.
El a agrega cu pa e motibo aki el a acerca varios stakeholder, pa sostene e curso aki. “Nos ta kere, aki den Fundacion SIKI, cu tur cos ta cuminza cu educacion. Educacion ta haci pa nos por realiza e embergadura di e problema y tambe cu nos por cuminza traha na cambio pa un miho Aruba. Un Aruba mas briyante. Mi no ta bisa cu tur cos a bay malo den pasado, pero si cu cosnan por bay hopi miho awo y den futuro”, Dr. Jayburtt Dijkhoff, a conclui.
