Yvonne Lee-Perez di DAO:
ORANJESTAD (AAN) –Yvonne Lee-Perez, funcionario di Departamento di Labor y Investigacion (DAO), tocando e tema con nos hobennan ta posiciona riba e mercado laboral, a splica den entrevista cu DIARIO, cu e grupo di hoben entre 15 pa 17 aña ta hopi chikito, y ta cuminza aumenta di 18 aña bay ariba, y ya di edad di 20 padilanti ta bira mucho mas grandi.
Esey ta positivo pa Aruba, pasobra den edad 18-20 bay ariba, tin hoben cu a caba scol, y tin biaha hasta nan ta combina scol cu un empleo. E ora ey nan ta wordo considera den e parti di participacion, pero por mira cu e grupo cu tin un educacion halto ta hopi chikito y esaki tambe ta bisto. E funcionnan cu nan ta haya no ta esnan halto.
E sector cu mas ta acapara e grupo aki ta hotel, food & beverage y servicio (restaurant) cu ta unda nan ta wordo mas emplea. Esaki DAO ta mir’e den su cifranan. E salarionan cu nan ta gana ta rond di salario minimo of un tiki mas. E hobennan aki no tin hopi aña den servicio, pues no por expect un salario halto siendo asina hoben ainda.
Yvonne Lee-Perez a menciona cu algo cu ta bon pa enfatiza riba dje, ta cu Nacionnan Uni tur aña ta pone un tema pa e grupo di hubentud, y e aña aki, pa Dia Mundial di Hubentud a pone enfasis riba e tema: “From Clicks to Progress: Youth Digital Pathways for Sustainable Development”.
Señora Lee-Perez a comenta cu e hobennan aki a nace, lanta y ta creciendo den e mundo digital y tur e tecnologianan cu esaki ta encera, y nan ta e grupo cu ta bay haci transformacion. “Y mirando cu nos ta cerca di aña 2030 cu, eigenlijk, mester yega na e metanan di SDG’s, loke ta sali den e mesun informacionnan cu Nacionnan Uni ta provee, ta cu tur e parti digital cu data, cu ta contribuyendo na e 69 targets di e 17 metanan cu tin, 70% ta bin di digital cu data”.
E importancia di e hobennan den esaki ta pa nan sigui desaroya den e parti digital pa nan por carga e futuro cu ta bay den e direccion aki, señora Yvonne Lee-Perez a bisa pa conclui.
