"Nos tin cu traha hunto pa fortalece relacion entre Hulanda y Aruba"

Prensa a cera conoci cu Vincent Storimans di VNO:

ORANJESTAD (AAN): Vincent Storimans tin algun luna ta traha na departamento di representacion di Hulanda na Aruba, VNO,  y recientemente el a organiza un encuentro cu prensa, pa asina prensa por conoce mas di cerca.

Durante e atardi na Amante Tapas Aruba, Storimans a cuminza na bisa cu e ta bezig ta siña Papiamento, pasobra e ta haya esey importante.

“Pa nos ta hopi importante pa nos tin un bon relacion cu prensa”.

Un bon prensa liber ta importante pa cada pais y tambe pa Aruba.

For di VNO nos tin e tradicion pa traha bon hunto y pesey despues di ta 5 luna riba e isla mi a manda e invitacion pa conoce prensa mas di cerca, segun Storimans.

El a sigui bisa cu desde prome di Juli e ta na Aruba y cu prome cu esey el a traha pa Ministerio di Asuntonan Externo, unda cu e tabata Consul General suplente na Consulado na San Francisco.

El a haci e trabao ey pa 5 aña.

“Eynan mi a traha cu hopi compania Hulandes, ‘startups’ y ‘scale ups’ cu tabata tin interes den haci negoshi na West Coast di Merca”.

Prome cu esey mi a traha na Embahada Hulandes na Washington D.C, den e seccion di Economia.

Semper mi trabao tabata consisti di traha cu companianan y cu sector priva y esey ta algo cu ministerio di Asuntonan Interno a haya atractivo, tambe pa nos esfuerzonan aki na Aruba, segun Storimans.

“Aruba y Hulanda ta comparti Reino Hulandes, pero tin mas espacio pa cooperacion mas estrecho cu locual te ainda a tuma lugar”, segun e representante di VNO.

E a duna e ehempel di autonan electrico cu cual Hulanda tin hopi experiencia.

Storimans a indica tambe cu el a papia cu minister Geoffrey Wever riba un cooperacion pa stimula companianan Hulandes pa establece nan mes y inverti den Aruba.

“Esaki ta un perspectiva nobo den cual mi ta kere y mi ta kere cu nos ta valioso pa otro como paisnan den Reino y mi ta kere si cu tin biaha tin malcomprondemento y confrontacion cu otro, pero ta hopi importante pa nos tin un bon relacion cu otro”.

Den e añanan cu ta bin mi kier traha riba esaki, segun Storimans.

“Mi ta invita prensa pero tambe poblacion di Aruba pa pensa hunto cu nos riba con nos por fortalece e relacion entre Aruba y Hulanda”, segun Storimans.