Lider di Plataforma Nos Pais, Otmar Oduber:
*Un di cada cuater pensionado ta biba den pobreza!
ORANJESTAD (AAN) – E lider di Plataforma Nos Pais, den conferencia di prensa tambe a elabora tocante e pensionadonan. El a bisa cu e pensionadonan no merece e bida cu nan tin e momentonan aki, pero ni un hende ta papia riba dje.
Oduber a señala cu e lider di Partido AVP a lanta fo’i soño ora cu Plataforma Pais, na December aña pasa, a cuminza papia di e pensionadonan, y nan a saca e cifranan di SVb, Banco Central, y tambe di CBS, unda cu a mustra cu despues di e reunionnan cu e Plataforma tabata tin na November-December aña pasa cu OPPA, y cu nan a mustra cu un den cada 4 pensionado na Aruba ta biba den pobreza. “No dificil, den pobreza!” el a remarca.
Tin cu no por come tres cuminda pa dia. Y na Aruba tin 26 mil pensionado. “Nos a bisa cu no por bay cobra un pensionado mas belasting despues cu el a baha cu pensioen. Nos no por sigui cobra e pensionado pasobra el a traha den su bida tin dos of tres pensioen, anto bo ta castig’e y hasta paga e prima mas halto di AZV cu ta 15.5%. Nan a kita remedi di nos pensionadonan cu nan ta custumbra cu ne pa diez-diescinco aña, mientras nos tin 10 mil hende indocumenta na Aruba, cu ta trahando den tur skina di e isla, den tur empresa na Aruba, pero nan no ta paga un florin di Belasting, ni un florin na SVb ni AZV. Pero tur ta bira malo na Aruba y tur ta haya remedi, si y ta costa placa na AZV, si”, segun lider di Plataforma Nos Pais, Otmar Oduber.
