Abogado cu su defensa a bisa Hues
ORANJESTAD (AAN): Diabierna pa oranan largo Hues di Corte di Husticia, a trata e caso penal cu Ministerio Publico a cuminsa contra e homber Americano J., kende ta worde acusa di a abusa di su yiu muher G. entre 2015 y Augustus 2023. E mucha G. a declara na Polis cu ta tempo cu e tabatin 4 aña, su tata a cuminsa mishi na su partinan intimo y ora e tabatin 5 aña e tata a tene relacion sexual cun’e te ora e tabatin 11 aña. E homber J. den Corte ta nenga categoricamente di a abusa di su yiu. Fiscal a exigi 9 aña di prison pa J. Den e articulo aki, ta publica e defensa di abogado.
Abogado: Den su defensa, abogado mr. Mohamed a bisa Hues cu e ta haya cu su cliente mester worde declara liber. E abogado a bisa cu J. ta desmenti di a abusa di su yiu y na opinion di mr. Mohamed, no tin prueba.
E abogado a bisa Hues cu tur informacion tocante e abuso, ta bin for di e mucha muher. E abogado a mustra cu e mucha ningun momento a reclama su tata.
E abogado a bisa cu ora e mucha tabata depresivo, ta e tata a bay busca e mucha pasobra e mama a bay sali cu un amigo.
Interpreta cos robez: Abogado mr. Mohamed a bisa Hues cu e expresionnan di J. riba chat di Whatsapp ta parce cu lo ta cosnan sexual pero no ta asina. E abogado a bisa cu J. ta Americano y ta usa expresionnan Americano y traduci den Papiamento, ta worde mal interpreta.
E abogado a sigui bisa cu riba e asunto di menstruacion, e tata tabata tuma su responsabilidad pa salud di su yiu. Door cu e mucha su periodo tabata no regular. E tata tabata papia habri cu su yiu y hasta dilanti e mama. Na opinion di mr. Mohamed, esaki ta mustra cu e tata no tabata haci nada malo, sino e no ta bay bisa esey pa e mama haya sa.
E abogado a bisa cu si realmente J. ta preocupa pa su yiu sali na estado, lo mester ta papia di test di sali na estado. E tata tabata papia di test na school y e mucha mes a bisa cu e no ta corda si tabata test di school of test di sali na estado, su tata tabata chat cun’e.
Abogado mr. Mohamed a cuestiona cu tabatin hopi chat entre J. y yiu pero Polis a coy e partinan cu ta laga mustra manera cu lo tin un relacion amoroso.
No tin prueba: E abogado a menciona den Corte cu tin sentencia di Corte Supremo caminda a declara sospechoso liber pasobra no tin prueba di sosten. E ta haya cu mesun cos mester sosode cu J. El a bisa cu for di ningun di e chatnan ta mustra cu tabatin un relacion sexual. E abogado a bisa cu J. tabata papia habri di sex cu su yiu muher pa educa su yiu muher.
El a reacciona cu no ta asina cu abuso di e mucha a sosode na cas di abuela, manera e mucha a declara na Polis, pasobra constantemente tabatin hende na e cas.
E abogado a bisa Hues cu e no ta haya cu tin prueba di sosten pasobra loke e mama a declara na Polis, ta loke su yiu a cont’e. E abogado tambe e mustra cu Fiscal ta usa declaracionnan di e mucha pa mustra cu J. ta culpable y no tin prueba di sosten.
E abogado ta haya cu mester declara su cliente limber. Hues a sera tratamento di e caso y a bisa cu e lo bay studia e caso y dia 4 October 2024 pa 8:15 am lo tin sentencia.
