Nos grandinan hopi agradecido cu e programa “Nos Amistad”

ORANJESTAD (AAN): Den un encuentro ameno e siman aki, a culmina e prome cyclo di 12 siman di e programa Nos Amistad,

cu a cuminsa e prome siman di juli despues cu e boluntarionan a sigui un curso specifico pa cu esaki.

   Durante 12 siman largo e boluntarionan Mena, Carmita, Mildred, Margarita, Mercedes y Richard a bishita un grandi di e barionan di Pos Chikito, Noord y Tanki Leendert, cu tabata sinti su mes un poco isola  motibo di e.o. e pandemia, cu no por a sali y topa otro hende y mas tanto tabata sera den cas pa cuida curpa.

   Bao guia di nan mentornan, nan a ehecuta e programa aki. E mentor tabata e persona di confianza di e boluntario y hunto tabata prepara e siguiente bishita y tambe ta evalua despues di cada encuentro. A  evalua e prome cyclo, unda nos boluntarionan cu nos a yama Nos Amistad,  por a trece nan experencia, e deseonan di e grandinan cu nan bishita y nan recomendacionnan pa un proximo cyclo cu ta programa pa otro aña.

   Na comienso di e encuentro coordinadora di e Proyecto Hunto Grandi, Grandi Hunto Señora Rosa Leon a dirigi algun palabra na e boluntarionan y mentornan. A gradici nan pa nan cooperacion den e Proyecto bunita aki pero tambe a trece dilanti cu nos tur a siña di e Proyecto aki cu ta unico den su forma.

   E boluntarionan a trece alegria back cerca e grandi cu tabata isola. E boluntario di su banda por a conta cu un mentor cu tabata para su tras pa cualkier informacion of duda cu e tabata tin. Asina hunto cu e coordinador, tur a traha hunto na bienestar di nos grandinan.

   Rudy Leysner, kende ta president di Fundacion Movemento ta bida tambe a gradici e boluntarionan, mentornan y coordinadora pa e bunita programa aki. Ta basta aña caba tabata preparando pa e programa aki cuminsa y awor porfin por a realisa esaki cu ta un necesidad hopi grandi mes, mas awor cu e pandemia. E parti di combati soledad entre nos grandinan mester sigui worde atendi na un escala mas grandi paso e soledad ta bay keda como cu nos comunidad ta birando mas bieu mas largo.

   Pa locual ta e grandinan por lo general tabata di alegria, di por a haya bishita di esnan cu tambe ta grandi, di haci actividadnan hunto na cas mes. A pasa e maintanan o sea desayunado hunto unda cu te hasta tawatin chuculat pinda, haciendo weganan di mesa manera Rummikub, cantamento hunto, haciendo obra di man, combersa y duna atenshon na otro.

   E boluntarionan a haya e guia di e mentornan hopi bon, como cu nan tabata sinti nan mes mas sigur di e trabao cu nan tabata bay haci. E comunicacion tabata hopi bon entre mentor y boluntarionan. Loke a resalta ta cu no ta un grandi so tabata interesa, pero a invita un, dos y hasta mas grandi pa comparti hunto e mainta informal. Importante tabata tambe cu si a palabra cu por ehempel ta bishita e grandi riba un diabierna, ta sigui bishita riba tur diabierna y asina e grandinan tawatin e siguransa cu e bishitanan ta continua.

   Recomendacionnan di parti di e boluntarionan tabata riba diferente tereno. Sigur ta pidi pa sigui cu e encuentronan y bishitanan na cas. Famianan mes por organiza esaki den nan seno pa bishita nan grandinan un bes pa siman pa pasa un rato agradabel cu otro.

   Tambe por hiba un grandi bay keiro y come algo y pasa tempo hunto.Directiva di FMTB, coordinador di Proyecto Hunto Grandi Grandi Hunto y mentornan pa medio di esaki ta gradici e boluntarionan masha hopi mes di pone nan mes y nan tempo disponibel pa e bunita programa aki unda a trece alegria back cerca e grandinan cu ta esnan cu ta mas isola den e temponan aki.