Minister Ursell Arends, titular di Transporte:
*P’esey a bin cu cambionan inmediatamente!
ORANJESTAD (AAN) – Minister Ursell Arends, a sigui splica den conferencia di prensa, relaciona cu e gremio di taxistanan y traspaso di vergunning, cu dia 26 di April 2022, a trek e maneho aki y a bin cu un maneho na unda ta traha a base di loke ley ta prescribi.
“Y durante henter e proceso aki nos a cana e caminda, a haci investigacionnan, nos a logra intercepta varios acto cu no ta integro y esey a conduci cu nos mester a tuma decisionnan, mirando cu e ta atacha e integridad di full e proceso, atacha integridad di departamentonan gubernamental, pero tambe ta atacha mi integridad como Minister di Transporte. Y p’esey mester a tuma decisionnan abrupto. Sea bo ta integro of bo no ta integro, y esey ta loke nos ta para p’e”, e dignatario a subraya.
E dignatario a sigui bisa cu pa loke ta trata e cloud system) unda cu permisonan, cu ta patrimonio di pueblo, ta bay na famianan of ta bay na personanan na escogencia di un taxista, y den cierto caso ta wordo hasta bendi ilegalmente.
E mandatario a comenta cu siman pasa e mester a trek un permiso, cual caso a bay te Corte, unda un vergunning cu ta patrimonio di pueblo a wordo bendi prome na 90 florin, y e di dos biaha na 75 mil florin. “Y akinan, ora e pagonan no ta wordo haci e 'vergunning houdernan' ta bati na porta pa informa di e iregularidadnan cu ta tumando lugar, cu tin contrato firma cu nan mester haya pago a cambio, y esey no ta sosode.
Minister Arends a bisa cu esaki ta un di e casonan cu gobierno a caba di trek un vergunning pero mescos cu esey, tin algun otro caso andando, unda ta yega na un areglo pa bende e vergunning, y despues e pago no ta bin. “Y aworaki e 'vergunning houdernan' ta keda sin saco y sin cangreu” e mandatario a expresa.
E mandatario a splica con e “cloud system” di permiso di taxi ta traha. “Esnan cu ta luchando eyfo, un di nan cu ta hasta liderando den protesta, pakico nan ta bringando? Pa e sistema keda entre nan. Por wak cu 1% caba di e 465 vergunning ta den man di un grupito, y asina aki nan kier sigui lucha pa e vergunning bira derecho di nan, pa nan por dicidi kico ta pasa den e sector aki. Mientras tanto, di otro banda nos tin cantidad di ciudadanonan, incluyendo e mesun hulpchauffeurnan cu tambe ta bringando pa yega na un vergunning, y esaki ta un cos cu nos no por tolera mas”, e dignatario a señala.
E mandatario a menciona cu vergunning di taxi ta parti di transporte publico y e ta limita na un cantidad di 465 permiso pa otorga, y casi tur e cantidad aki ta otorga caba.
Hopi taxista ora nan no kier traha mas, of no kier haci uso di dje mas, ta traspasa e permiso aki na un persona di nan escogencia y na nos parecer esaki no ta algo husto y esey tambe a bin cu e cambionan aki, segun Minister di Transporte Ursell Arends.
“No tin motibo pa keda den un sistema corupto mientras ta traha riba e derechonan y drecha e problema. P’esey a scoge pa haci e cambionan aki inmediatamente”, e dignatario a señala.
