Den situación Hulandes y mundial e actitud corecto enfrente studiante
*Studiantenan Arubano na Hulanda beneficia cu manual informativo
*Manual ta habri caminda tambe pa buskeda di contacto den problema
ORANJESTAD(AAN)—E problemanan social serio cu ta presenta nan mes na Hulanda, tabata uno di e temanan cu mas DIARIO a aborda durante ultimo aña, poniendo enfasis riba e efectonan cu nan lo tin pa sigur estudiantenan cu ta biba na Hulanda.
Cu DIARIO a wordo corectamente informa dor di su fuentenan na Hulanda y a informa Aruba debidamente, no solamente a bini dilanti den e demandanan pa gobernacion nobo na Hulanda, pero awor ta wordo afirma dor di e forma aserta cu Gabinete di Aruba na Hulanda, ta atende problemanan.
Manera lectornan di DIARIO por a tuma nota, informacionnan publica ta papia di e accion di Gabinete di Aruba na Hulanda pa sondea loke ta biba bou studiantenan Arubano na Hulanda.
Manera oficialmente ta wordo anuncia, un encuesta a confirma cu studiantenan di Aruba ta sinti falta di informacion concreto riba loke ta spera nan ora nan subi avion pa bay Hulanda.
DIARIO a presenta na Aruba e problema serio cu ta presenta, ora Arubianonan muda pa Hulanda, cu sistemanan di convivencia diferente di Aruba pero tambe di asuntonan oficial cu cual nan mester atende.
E falta di informacion riba realidad di bida na Hulanda ta causante di problema pa studiantenan, cu mester di guia necesario.
DIARIO ta aplaudi e informacion cu e Gabinete di Aruba pues a dicidi pa introduci un guia den cual informacionnan necesario ta wordo entrega na e hobennan cu mester habri nan caminda di bida na Hulanda.
E accion aki sigur mester di sosten di tur Arubiano pa e bira conoci cerca studiantenan pero tambe ta representa un base di informacion pa cantidad di Arubiano cu, los di estudio, kier establece nan mes na Hulanda.
Cambio ta e palabra sumamente importante na Hulanda cu kier mira reforma riba hopi tereno y solucion pa problemanan cu cual e poblacion ta wordo confronta no solamente pa motibo di desaroyonan na Hulanda, pero manera ta e caso rond mundo, cu situacionnan mundial cu tin un resultado directo pa tur pais na mundo.
Medidanan serio mester wordo tuma na tur rango di gobernacion Hulandes pa confronta entre otro e necesidad grandi di vivienda cu ta uno di e problemanan serio cu e pais ta enfrenta.
E situacion financiero Hulandes, cu ta exigi pa medidanan drastico wordo tuma pa reduci gastonan na tur nivel di gobernacion di e pais, tin nan resultadonan tambe.
Sin duda e manual cu a wordo presenta pa e Gabinete di Aruba na Hulanda ta habri porta na un momento sumamente importante, pa sigur studiantenan hoben cu ta yega e pais cu entusiasmo grandi, ta den contacto tambe cu fuente di solucion pa cualkier problema por presenta.
DIARIO ta aplaudi e introduccion di e manual di Gabinete di Aruba na Hulanda y lo sostene e maximo uso di e instrumento informativo tan valioso pa hobennan cu mester prepara nan mes pa un dia bolbe Aruba, pa sostene adelanto di nan pais.
