Rino Hermans di Bureau Rampenbestrijding
ORANJESTAD (AAN): Director di Bureau Rampenbestrijding Aruba (BRA), Rino Hermans, ta duna di conoce cu no mester considera Covid-19 como un calamidad. E tabata un crisis di salud pasobra si tabata un calamidad no lo tin infrastructura, ni e parti di utilidad, comunicacion cu lo a cay afo.
Hermans a splica cu pa esey Aruba ta preparando p'e pa por stabilisa y pa por haya ayudo internacional.
A agrega cu Covid tabata un crisis di salud y un crisis mental. El a impacta hopi hende nan salud mental, pero no tabata tin dañonan di infrastructura y no tabata tin un paralisacion di e economia door di no tin infrastructura.
Den un calamidad mes manera horcan of temblor, e recuperacion lo a dura hopi mas luna y e situacion lo tabata full otro cu Covid, a remarca.
Pesey mester sigui train y sigui prepara. El a laga sa cu BRA tin afspraak cu gobierno di Aruba cu tin un fondo reserva pa atende cualkier caso abrupto cu lo por sosode. Ta bezig tambe pa fortifica e seguridad den Reino Hulandes y cu e partnernan internacional, Hermans a indica.
E partnernan ora cu nan inverti nan kier wak unda nan inversion ta bay, a remarca.
Rino Hermans a laga sa cu na Aruba tin seis nivel y 'up scaling'. E tres prome nivelnan ta local (unda BRA ta aplica su logistica). E di cuater nivel ta e otro islanan den Caribe Hulandes. Nivel cinco, Hulanda ta cay aden, pero e ora ey caba ya tin rond di 12 pa 15 dia den e situacion y nivel 6 ta internacional.
A agrega cu trece hende pa yuda no ta problema, pero logistica lo nifica un trabao mas grandi. "Tin un upscaling system di 6 niveau y internacionalmente nan ta conoci cu ne. Pero no ta depende di nos mesun hendenan e prome 10 dianan", Rino Hermans a señala.
