Meverly Romano PR di DIMP:
ORANJESTAD (AAN)—Departamento di Impuesto (DIMP), a introduci desde aña 1917, e sistema di multa, cu ta un sistema cu ta obliga e automobilistanan pa cumpli cu nan debernan fiscal.
E control di esaki ta den man di Cuerpo Policial, Relacionista Publico di DIMP, Meverly Romano a enfatiza den entrevista cu DIARIO, agregando cu e boet no ta 10% sino 50% di e suma cu tin habri.
“Un automobilista por postpone e pago mey aña of un aña, of keda sin paga dos of tres aña, pero ta yega un momento cu e ta haya un cobranza. E tin debe cu ta keda wordo acumula, y esey ta e parti mas fastioso p’e mes pasobra na dado momento ta bay hay’e cu un debe mucho mas halto pa via di e number di auto”, Romano a remarca.
El a señala cu esey no mester ta asina. Cu gewoon, un persona mester a conciente cu na momento cu tin un vehiculo di motor cu e ta subi caminda cu ne, e tin mester di tin su papelnan na ordo.
“Esaki ta keda algo hopi importante. No laga keda e debe acumula. E ta bira mas dificil pa paga despues y ora cu e control tuma lugar riba camindanan publico, cu Cuerpo di Polis haci di su parti, tambe e boet ta algo cu ta bin acerca. Pues, e ta keda algo di tur aña. Semper tin un grupo cu ta cumpli hopi bon, y nos ta hopi agradecido pa cu e grupo aki, pero tambe tin un grupo cu no ta mucho conciente di e cumplimento pa cu impuesto”, Meverly Romano a enfatiza.
