ORANJESTAD (AAN): Awe Diahuebs, muchanan di entre 4 y 14 aña ta bay expone nan vision di e estilo di uno di e artistanan plastico di mas grandi di historia.
E exhibicion ta tuma luga den un atardi special cu ta forma parti di serie organiza pa Art Is Fun Foundation, dirigi pa Maria Magdalena Gonzalez.
E serie a cuminsa algun luna atras cu un exhibicion basa riba e vision di e muchanan tocante e estilo di impresionismo, basa riba e educacion cu nan a ricibi tocante trabaonan di Monet, Degas y Van Gogh. Siguiendo cu otro maestro di pintura mundial, awo ta turno pa celebra e bida y legado di e recien fayecido artista Colombiano Fernando Botero.
Mescos cu Alejandro Otero y Carlos Cruz Diez, Botero ta un di e principal artistanan Latinoamericano cu a laga un marca atras na e nivel mundial di arte; te na e punto cu el a crea su propio estilo yama apropiadamente Boterismo.
Esey ta loke un grupo di 50 mucha local a siña y despues a pidi nan pa crea un obra di nan propio inspiracion basa riba e estilo aki. Tambe ta interesante pa menciona, cu Art Is Fun a selecciona tres studiante, di 11, 12 y 13 aña pa fungi como curator di e exposicion.
“Nos ta celebrando, recreando y disfrutando loke ta Botero su estilo y su expresion plastico door di e vision di e muchanan,” asina Gonzalez a splica. “Aunke hopi hende ta bisa cu ta djis hende gordo el a pinta, no tabata esey so. El a pinta tur cos oversize y ta interesante pa wak con un mucha ta expresa loke e ta wak den e estilo di e maestro Botero.”
E evento ta sirbi tambe como e celebracion pa cera aña 2023 y e dianan di fiesta pa Art Is Fun cu tin entre su alumnonan varios mucha cu nan a duna un beca fomentando asina e inclusion di tur mucha den e mundo di arte plastico. E exhibicion ta un muestra di e talento di e muchanan, pero tambe di e dedicacion y esfuerso di e profesornan pa promove arte na Aruba.
E invitacion ta pa un y tur pasa diahuebs awo 14 di december na e studio situa na Quartz Building na Boegoeroei 24-B, dilanti di Sherwin Williams, local #1 pa 4’or di atardi. Entrada ta gratis y ta un excelente oportunidad pa sostene e muchanan aki y nos tur expone nos mes un poco na e maraviyoso mundo di arte.
