MEXICO CITY: Siman pasa riba social media, un persona na Mexico a denuncia cu un areglo di flor cu forma di curazon a wordo horta di santana Jardines del Humaya na Culiacán, Mexico.
E santana aki ta conoci como e lugar unda nan ta dera comerciante y politiconan famoso, y awor e lo bira conoci tambe di ta e santana di unda un hende enamora a horta un areglo di flor riba Dia di Amor y Amistad.
Un dia despues di Dia di San Valentino, un persona usando Facebook cu yama José Moreno a share un potret di un areglo floral cu ta consisti di monton di rosa cora cu forma di curazon, y un canasta di flor mas abao.
“Na e muher cu nan a regalabo un curazon manera esaki, ta bon pa bo sa cu nan a horte for di un graf na santana Jardines.”
Aunke te cu ainda no ta conoci si e denuncia ta legitimo, of si e graf cu a wordo profana ta di un difunto cercano di e persona cu a pone potret, hecho ta cu esaki a cuminza plama rond riba social media.
E reaccionnan no a tarda pa drenta. Hendenan cu a haya esaki a keda ta hari so, pero toch hopi hende riba social media a mustra cu nan a keda sorprendi pa e hazaña di e persona enamora, capaz di haci tur cos, incluyendo mishi cu cosnan sagrado di un defunto pa horta un areglo floral y bay sorprende su pareha.
“Nunca mi a pensa cu e cosnan aki ta socede,” un muher a skirbi como comentario riba e publicacion riba Facebook, unda por a mira e potret di e areglo floral grandi den forma di curazon.
