ORANJESTAD (AAN): For di dialuna 1 di maart 2022, Gobernador di Aruba tin un website nobo.
Na Papiamento e ta accesibel via www.gobernadoraruba.com. Pa e mesun informacion na Hulandes por bishita www.gouverneuraruba.com.
E informacion riba e website nobo ta reparti den tres categoria principal: Gobernador di Aruba, Gabinete di Gobernador y e departamento di Asuntonan Consular.
Gobernador Riba e pagina di Gobernador, por haya informacion tocante e background y carera di e actual Gobernador y di e Gobernador suplente. Tambe por lesa tocante e autoridad y encargonan di Gobernador. Den e categoria principal aki por lesa mas tambe tocante e Ayudante di Gobernador y por haya un bista di tur Gobernador y Gobernador suplente cu tabatin na Aruba desde 1986 te cu awor. A inclui un descripcion di e anterior cas di Gobernador cu ta uza awor como cas di recepcion ceremonial y tambe por haya informacion tocante e bandera distintivo di Gobernador di Aruba.
Gabinete Gabinete di Gobernador ta sostene e Gobernador cu ehercicio di su tareanan: ta trata di un organisacion oficial cu ta cumpli cu un papel di informacion, di iniciativa y di conseho. Riba e website ta describi kico ta e tareanan di e Gabinete, con e organisacion ta hinca den otro y con ta maneh’e.
Asuntonan Consular: Residentenan di Aruba cu ta bini Gabinete pa servicio consular, tin contacto cu colaboradornan di e departamento di Asuntonan Consular. E departamento aki ta responsabel pa e procedemento di peticion pa nacionalidad Hulandes a traves di opcion of naturalisacion, otorgamento di paspoort nacional na no-residente di Aruba, suministro di documento di biahe di emergencia y suministro di visa pa tanto teritorio Caribense como teritorio Schengen. E colaboradornan ta haci esaki na nomber di Gobernador. Riba e website ta describi e servicionan consular y ta duna splicacion riba e procedemento di peticion.
Riba e pagina di contacto por mira tur e datonan di contacto y tambe un bista general di e oranan di consulta via di telefon y ora di consulta sin cita previo di e departamento di Asuntonan Consular.
Normanan Europeo: E website nobo ta traha riba ‘Platform Rijksoverheid’ cual ta cumpli cu e normanan Europeo, entre cua e normanan pa accesibilidad cu un website mester tin.
