Directie Natuur en Milieu:
*Raton di anochi por biba te cu 10 aña
ORANJESTAD (AAN): Directie Natuur en Milieu a duna di conoce algun dato interesante tocante e raton di anochi.
E raton di anochi conoci na Ingles como ‘Curacaoan Long-nosed bat’ (Leptonycteri curasoae) y e otro ratonnan di anochi, ta e unico especie di mamifero (zoogdier) bulado cu ta existi. Tur ta bestianan cu ta move anochi paso den dia nan ta drumi boca abou. P’esey tambe e ta haya su nomber raton di anochi. Esun aki ta crece te 55 milimeter e ta clasifica como un tamaño mediano. Su horeanan ta relativamente chikito y e parti cu ta su nanishi ta largo y cu un lenga largo cu ta caba den un punta fini, largo pa asina e extrae e nectar for di flor.
E ta un animal cu hala, y lana riba su cuero y cu ta bula. Su halanan ta cortico y cu cuero suave cu ta conecta cu su dedenan y pianan. E raton di anochi ta uza zonido pa localisa obheto (echolocacion).
Na Aruba tin diferente sorto di raton di anochi, tin cu ta comedo di insecto, ta chupa nectar, comedo di fruta y tin cu ta come pisca. Esun aki 𝘓. 𝘤𝘶𝘳𝘢𝘴𝘰𝘢𝘦 ta chupa nectar y ta come fruta.
E colornan di e raton di anochi aki ta shinishi te bruin scur. E bestianan aki ta drenta fase di reproducion basta laat y ta haya mayoria biaha un yiu. Nan ta duna e yiu lechi pa 2 luna ongeveer.
E raton di anochi 𝘓.𝘤𝘶𝘳𝘢𝘴𝘰𝘢𝘦 ta prefera biba den cueba cayente y humedo pero tin otronan cu ta biba den mina y casnan bandona den scuridad. Nan ta colga boca abou for di nan garanan di pia pa descansa.
Raton di anochi por biba te cu 10 aña. Pero su existencia ta menasa pa hende, tambe parhanan grandi, manera shoco of tambe pushi por ataca raton di anochi pa cuminda. Un cos ta sigur cu raton di anochi su presencia no ta saludabel pa hende. Nan tin hopi molester di purga y carpata y ta trece un holo fuerte cu nan.
Nan ta haci un trabou importante si, esun di polinisa mata por ehempel e cadushinan pa despues esaki pari fruta. Tambe nan ta yuda distribui simia di matanan importante pa nos ecosistema y combati pester di insectonan cu ta malo pa hende.
Nan existencia ta na peliger pavia di e manera cu nan ta come pues nan ta depende di cierto cadushi, agave y fruta di mondi. Pa via di destruccion di habitat, e cantidad di e disponibilidad di nan cuminda ta baha p’esey mester mas esfuerso di conservacion.
