Musiconan feliz cu flexibilizacion di medidanan y awor tur hende ban balia

Entrevista di DIARIO cu musico local Igor Hasham

ORANJESTAD (AAN): Desde cu algun dia pasa, Gobierno di Aruba a practicamente elimina tur medida y a flexibiliza tur Decreto Ministerial cu tabatin pa yuda mitiga e brote di Coronavirus, por a nota cu hopi grupo den comunidad a hala un rosea profundo.  Enberdad, e pandemia fuerte cu a azota mundo na Maart 2020 tabata un golpi duro contra tur esnan cu ta envolvi den e industria di entretenimento, y a casi paraliza musica en general.

   E siman cu musica a stop:  E pandemia no a djis cancela un monton di concierto, tours, festival, y competencia rond mundo, sino a pone algun musico hasta biba pa algun luna sin entrada cu nan ta costumbra di dje, incluyendo Aruba.  Tocamento den fin di siman na Hotelnan, na Restaurant, y varios Cocktail Lounge a finaliza den un frega di wowo.  Varios fiesta di bruid programa di antemano no a sigui mas, y tur esaki a pone cu musiconan no tabatin lugar mes pa toca.

   Rond mundo, e industria multibiyonario di musica a bay den un pausa indefini y a trece efectonan cataclysmico riba e resto di negoshinan di entretenimento. E crisis aki a crea hopi reaccion di musiconan, cu tabata opina cu esnan cu ta maneha e reglanan pa publico no tabata preocupa mes cu e situacion di esnan den e industria.

   Diripiente ora cu e casonan activo a cuminza baha, a habri e porta un tiki y tabata permiti 1 of 2 musico toca na empresanan local, pero djis como ‘background music’, y nada cu ta stimula e bishitantenan pa lanta para y bay balia.

   Hopi duro pa musiconan:  “Pa bisabo e berdad, e tabata hopi duro pa e musiconan,” ta loke e conocido musico local Igor Hasham a indica na DIARIO.  Ainda e ta corda riba e siman cu musica a stop!  Na comienzo di Maart 2020 ora cu tur hende tabata preparando pa e Festivalnan cu tin rond di celebracion di Dia di Himno y Bandera na Aruba.

   Musiconan a cuminza observa e storia con casonan di Coronavirus nobo aki a cuminza plama na Europa.  Tambe a keda spanta riba un Diadomingo, ora cu a tende cu ta bay tuma medida contra un vuelo cu ta yegando di Hulanda, y cu lo por  tin hende contagia abordo.

   Apenas despues, e siman a yega cu musica a stop na Aruba!  E prome casonan di Coronavirus a wordo detecta na Aruba, y e isla a shut down.  Den un frega di wowo, miles di hende a keda sin entrada, sin sa ta cuanto esaki lo bay dura.  Pasobra e ta un malesa completamente nobo, ningun hende no por sa e contesta ey tampoco.

   Igor Hasham, kende ta conoci cerca su amigonan tambe como ‘Tio Doc’, a splica cu su grupo musical a bay den hibernacion total.  Pero e mes a keda haci uso di e chens pa train riba su keyboard, riba su baho, y sigui skirbi letra pa cancion y perfecciona su musica. Training di banda a sigui?  Igor a bisa cu durante Toque de Queda, tur esey a stop.  Ora cu esey a flexibiliza, nan a cuminza train bek, y concentra pa traha riba cancionnan nobo.  Na December mes cu a pasa, nan banda a lanza 3 cancion nobo.

   Pero no ta e musiconan so tabata keha!  Publico di Aruba ta amante di gran fiesta, y stima un baliamento.  Nan tambe tabata haya falta di dal dos riba pista di baile.  Y esaki ta mensahenan cu musiconan local tabata ricibi tambe.

   Ora cu a habri chens pa 3 musico maximo toca na restaurant of negoshinan, tabatin grupo cu a logra “minimaliza” e banda y asina bay toca toch pa haya entrada.  Aunke nan no tabata mag di stimula hende pa baila.  Y asina a sigui cu e resto di 2020 y tambe 2021.

   “Nos ta haya hendenan ta bisa nos, ta con hopi nan ta anhela pa subi pista y balia e dushi cancion di Sonora Matancera cu yama ‘Florecilla de Amor’, y tambe ‘Respeta mi Dolor’ pa nan goza,” Tio Doc a indica.  Pesey e tambe ta hopi contento cu recien a flexibiliza tur medida, y baliamento por bek atrobe.

   Riba e pregunta di DIARIO, si acaso ya caba Tio Doc ta cla pa cuminza toca y deleita publico cu pieza y ambiente, el a haci y bisa cu nan ta cla pe e fin di siman aki caba.  Segun Hasham, ora a haya sa di e flexibilizacion, cu mesora el a percura pa su grupo musical actua, esta e banda “Nos Cu Nos” ta cla pa cuminza toca atrobe.  E grupo ta conta cu cantantenan Lorenzo Flores y Quincy Hasham.  Como trompetista y coro tin Hubert Leerst, y Keyboard y coro tin Igor Hasham mes.

   DIARIO a nota cu e weekend aki mes tin hopi “happening” y a puntra Igor que hubo di nan?  El a bisa cu Diadomingo 6 di Maart mes nan lo ta na Young Fellow Bar riba Green Corridor na Barcadera.  El a splica cu for di 6’or di atardi te cu 10’or di anochi, lo bay toca cancionnan manera Ultimo Romantico, Oye, Mi Kier Sali Cubo, Tembla, Negrura, Golpe Con Golpe, Conciencia, y Amada Amante.

   Den di dos set nan lo toca Paloma Blanca, Oiga Mire Vea, Daniel, ‘Namorao, Tuma Tur, Muchachita Mia, P’alla Voy, Te He Prometido, Hello Merengue, Garza Blanca, Primintimi, y Amor Divino. El a bisa cu den di tercer set lo bay scucha loke pueblo ta pidi pe.

   Pero que hubo di Florecilla de Amor?  Igor Hasham a hari y a bisa cu cancionnan clasico manera e.o. Respeta Mi Dolor, y Florecilla de Amor ta wordo toca 100% tambe mey-mey di e cancionnan ey.  El a bisa cu sigur hopi hende ta entusiasma cu musica tey bek, baliamento a cuminza atrobe, y awor ta tur hende riba nan mes tin di proteha nan mes di cualkier contagio.  Pues si bo ta sinti cu ainda bo kier proteha bo mes, dal bay y balia cu bo tapaboca.  Si bo kier of no, abo ta escoge pa proteha bo mes.