Costo di bida ta subi cu e aumento di su gastonan pa costo di bida
*Su impacto a bira mucho mas serio cu solamente peliger adiccion
*Na 2030 su influencia riba mercado mundial economico ta 1.7 Biyon
ORANJESTAD (AAN) — Kico e efecto di un telefon celular tin riba un mucha? Esaki algun aña pasa tabata parce di ta uno di e preocupacionnan mas grandi den uso di telefon mobil, cu a desaroya rapidamente di un telefon portatil pa hende papia cu otro te na un aparato di cual hende a bira completamenta dependiente.
Si prome e telefon mobil a haci posibel pa hende papia cu otro, el a cuminsa haci posibel pa hende mira otro.
El a bira grabador. El a bira camara cu ta produci portret. El a bira aparato pa copia documentonan. E ta baha tur informacion necesario riba internet.
Hende por usa su telefon pa e por sigui e ruta corecto ora e ta biaha. E por haya e hora exacto di e lugar caminda e ta bay y informa su mes di condicionnan di tempo.
Den e telefon di hende tin e lista cu ta splica kico e mester haci y kico e mester cumpra, mientras e por sigui noticia mundial.
Pa muchanan e tin cantidad di wega. Amigonan nobo ta wordo crea rond mundo pa medio di programanan cu ta uni hende cu otro.
El a bira yabi pa habri porta. El a bira “app” cu ta maneha bida di hende, cu a bira dependiente di su funcionamento.
Si no tin wifi, si no tin data, problema ta cuminsa. Bida a paralisa. Caos a resulta.
Kico e ta haci cu hende, ta conoci. E ta duna tur hende oportunidad pa tin contacto cu otro 24 hora pa dia. Hende practicamente ta biba den cas di otro.
Esaki ta haci cu hende no tin motibo pa bishita otro mas pero simplemente ta “app” otro.
Hende a bira completamente dependiente di telefon, cu ta duna tur asistencia cu e mester, pero tambe conoce peliger sumamente grandi, cu pa un gran parti no ta haya e atencion rekeri, pasobra hende no ta duna telefon e lugar y atencion cu e merece.
Pa por comunica mester di telefon. Mas sofistica e telefon, mas halto e gastonan pa compra ta bira, aunke prijs a baha a medio cu e telefon a bira centro di bida di hende y oficina principal di gobernacion y tur empresa priva.
Pero gastonan pa haci uso di telefon como centro di bida a subi, aunke hamas e por reemplasa e produccion mara na e gastonan cu ta wordo evita y ta cay afo aunke e calidad ta baha y sigur e necesidad di hende pa ta creativo y inventivo tambe ta subi.
E telefon ta deshaci di peliger, manera Polis por bisa. E hecho cu hende por graba y saca portret ta haci delicuentenan presta mas atencion na e realidad cu nan por wordo descubri.
Di otro banda, e loke telefon ta ofrece como servicio gratis di fotografo te grabador, te productor di comunicacion dor di criminalnan, cu ta asisti criminalidad y ta percura pa tiponan nobo di crimen.
Pa mucha awe telefon tin beneficio. Nan por comunica cu otro, comunica cu school, participa na weganan na distancia largo, pero tambe nan ta wordo pone na peligro den sigur nan inocencia cu por pone nan den contacto cu criminalnan.
Uno di e problemanan grandi cu ta presenta su mes ta, ora un hende perde su telefon. Tur number di telefon a bay perdi, tur informacion a bay perdi, a menos cu nan tabata parti paginanan social di e ta keda parti.
E momento a yega pa cuminsa papia di telefon y su efectonan riba tanto tereno. E momento a yega pa tene telefon na consideracion y evita uso di telefon na lugarnan priva y durante combersacionnan personal.
Hamas mester permiti uso di un telefon na e momento cu ta atende cu documentonan secreto of interior di cas di hende.
Evita uso di telefon den combersacion pa despues no topa cu un portret cu un imagen di loke no ta.
No lubida nunca riba e peliger mortal di drumi cu telefon den man y no lubida nunca cu un app cu a wordo copia, por cay den man di un ladron, cu asina ta ricibi e formula secreto pa mira cuanto placa tin na banco of con ta habri porta.
Un telefon a bira portador di e secretonan mas intimo di hende, cu a bira dependiente di un formula nobo cu lo haci bida mas facil, cu menos trabou, menos esfuerso, menos necesidad di tanto aparato y ekipo cu awe ta entrada di tanto hende.
