ORANJESTAD (AAN) — Michella Steenvoorde-Lacle, Beleidmedewerker Social y vocero di e proyecto piloto “Plan di Mayor”,
a anuncia cu e siman aki ta cuminza cu e proyecto y e ta bay tin un duracion di cinco aña. Den entrevista cu DIARIO el a splica di kico e proyecto aki ta trata.
El a splica cu e proyecto piloto aki tin diferente faceta unda nan ta bay haci diferente investigacion tocante divorcio, separacion, y e efectonan cu nan tin pa e mucha y hobennan di Aruba.
El a splica cu prome cu e pareha ta bay tuma e decision di divorcia of separa nan ta bay tin un caminda pa nan bay, y haya informacion. Nan ta bay haci un triage pa wak si e conflicto ta den grado 1, grado 2 of grado 3, y ta wak den ki ruta e conflictonan ta bay.
Aworaki, pa e ruta dos tin pensa di entrena 12 profesional como mediador di famia caba, y ora ey nan por guia e mayornan cu maximal cinco “mediation gesprek”. Y pa e muchanan ta bay entrena 44 persona den enseñanza pa bira “kies coach” pa nan haya ayudo via un “kies interventie” programa. E Comision di Mayor, via un team di seleccion, a scoge 12 profesional cu ta traha den diferente ramo pa “volg” prome e “basis mediation” y despues e “family mediation”.
Michella a menciona cu na Aruba 240 mayor ta divorcia pa aña y segun cifranan esaki ta nifica cu mas of menos 250 mucha ta premira un divorcio pa aña, oficialmente. Si tene cuenta cu mayornan cu no a casa y cu ta separa, por papia di 500 mucha y mundialmente ta conoci cu muchanan den e periodo ey, por experiencia traumanan cu kizas ta cortico, of di largo duracion. Pa evita esey, y yuda haci e transicion aki mas calmo posible, pa e muchanan keda central.
