Na un momento cu ansia pa poder ta trapa riba ser humano
*Temblor na 1906 tabata 30 bez mas fuerte cu un bom atomico
*Un aña despues di Ukraine, naturalesa ta yena mundo cu dolor
ORANJESTAD(AAN)—Den e tarea diario di periodismo, tin sucesonan cu ta hiba nos na sabiduria humano.
Kico ley ta bisa? Kico ta pasa si multiplica cinco cu cinco? Cuanto strea por tin na cielo? Cual partido politico ta mas fuerte?
Na final di 2022 nos a splica, cu medio di comunicion tin e deber di prepara Pueblo pa futuro pa a asina tur miembro di poblacion por carga su responsabilidad.
Tur e tareanan aki ta bira nulo den nan contenido ora e informacion drenta cu suela a tembla y cu un temblor a causa desastre humano, pio cu cualkier arma na Ukraine of cualkier guera por causa.
2023 a habri basicamente manera informacionnan humano a indica pero tambe cu sucesonan cu hamas por a mira adelanta.
Ta conoci cu na cierto partinan di mundo, por spera semper un temblor, un actividad di volcan, horcan, mal tempo y asina nos por sigui.
Pero hamas un periodista por bisa te awor, na cual momento y na unda un hende mester ta prepara pa enfrenta e horor cu na e momentonan aki ta wordo registra na Turquia y Siria, cu ta uni henter mundo den loke a bira desesperacion humano.
Cada minut cu pasa e cantidad di mortonan na e forma mas cruel ta sigui subi.
Hende poderoso ta sclama enfrente e holor cu ta presenta su dilanti y ta parce di ta entrega e mensahe cu nos mester pa asina cuminsa mira e limite di e ser humano y tambe kico e ta haci cu su poder pa destrui.
Ta casi un aña pasa, cu Rusia a duna prueba di su “forsa” ora el a trapa riba tur derecho di hende y pais, cu su invasion di Ukraine, cu a crea desesperacion rond mundo.
Cierto pais no tin pan pa come. Otro ta scucha con nan miembronan di famia ta muri den guera.
For di inicio di 2022, mundo no conoce trankilidad.
E ansia cu cualkier momento un bom atomico por destrui un parti di mundo y causa tercer guera mundial, ta parti di hende, cu ta trata di sigui cu su bida como sifuera nada ta pasa.
Na e momentonan aki, dolor ta yena henter mundo y tur hende cu sentimentonan humano ora mira e cantidad di morto subi y hende den impotencia total, mester acepta resultado di temblor.
Awe hende mester bolbe na e realidad di su limitacion hasta den produccion di destruccion.
Cifranan ta indica cu e temblor di 1906 cu a destrui San Francisco, tabata 30 biaha mas poderoso cu un bom atomico.
Di kico nos ta papia awe na Siria y Turquia? Mientrastanto kico hende mes ta haci cu hende na tanto parti di mundo manera Ukraine?
Un catastrofe natural ta presenta na hende e realidad. Ni den produccion di dolor y morto, hende por supera loke naturalesa por provoca den menos cu un minut ora e pusha hende den e realidad cu hende no ta existi pa destrui pero pa percura pa bienestar di tur hende.
Awe dos parti di mundo ta wordo presenta den un dolor. E angustia y miseria di guera provoca pa hende cu por conoce un fin pa medio di hende; y e angustia y miseria di un catastrofe cu hende no por controla.
Nos pensamentonan ta cu e personanan cu a bira victima y cu awe ta biba den e angustia, cu mester sirbi pa nos como ehempel, con limita poder na mundo ta realmente pa hende!
