Muchanan a gosa Hospi Bondi Camp 2024

ORANJESTAD (AAN):  Ya ta di 32 edicion di Horacio Oduber Hospital su tan gusta Hospi Bondi Camp.

Esaki ta di dos aña consecutivo cu e comision ta organisa e camp aki pa tres siman largo. E famoso camp di HOH ta yena cu actividad  pe yiunan y nieto di empleadonan. Asina mayornan por sigui traha trankil mientras nan yiu ta bon cuida y entreteni durante temporada di vakantie. Hospi Bondi camp a culmina cu un clausura mescos tur aña unda cu e muchanan ta demostra nan talento cu un show p’e mayornan por disfruta. Y ya caba durante clausura muchanan ta conta cu nan no por warda pa otro aña yega atrobe pa nan sigui disfruta cu nan amiguitonan.

            Rachelle Roos, Presidente di comision Hospi Bondi Camp, a duna di conoce cu aña pasa a pidi pa test haci na luga di dos siman un camp di tres siman. Mirando e exito a ripiti esaki e aña aki atrobe. E tabata sigur un reto pa yena e camp cu actividad y entretenimento pa 3 siman largo. Semper ta conta cu un participacion grandi di mucha tur siman y esey ta keda un reto tur aña mirando cu no tur luga por ricibi gruponan asina grandi. Pero manera semper e comision Hospi Bondi Camp ta creativo y ta busca manera pa haci lo imposbel, posibel! Entre e actividadnan cu tabatin ta bay diferente lama, parke arawa, cinema, bowling, parke di bestia y tambe actividad deportivo, hasta trece ‘jumping castle’ y pool na e plaza di Hospi Bondi na Hospital mes.

            Obi Tromp, lider na Hospi Bondi Camp, ya caba ta participando alrededor di 15 aña. Promo como mucha y awo e tin tres aña como lider. Obi Tromp a expresa cu “aunke nos ta jong, toch nos ta siña di trempan pa atende cu e muchanan. Mester tin amor grandi pa mucha y pasenshi. “Hospi Bondi ta unico y ora bo bin kinan, nunca bo kier bay cas bek!” 

            Por ultimo Rachelle Roos a gradici e comision, e lidernan y sigur Hunta di Directiva cu ta e motor tras di Hospi Bondi Camp. Tambe el a gradici e diferente departamentonan di HOH pa nan aporte y tur otro colega cu a yuda masha hopi mes y tabata di gran sosten pa e camp. Por ultimo el a gradici e lidernan y e muchanan y claro e  mayornan pasobra sin nan no tin Hospi Bondi Camp.

            Manera semper e camp ta pasa lihe y e muchanan a keda hopi cansa pero contento. E muchanan sigur a crea memorianan cu nan no lo lubida nunca. Un bes mas, un tremendo Hospi Bondi Camp 2024 unda cu e muchanan a pasa tres siman yena di alegria, accion, aventura y amistad. Y claro loke tur mucha ta bisa na final ta cu nan no por warda pa otro aña yega pa nan bay Hospi Bondi Camp atrobe.