Muchanan a celebra nan dia c'un tremendo  'Super Heroes Parade 2023'

ORANJESTAD (AAN):    Dialuna mainta trafico na Aruba tabata basta druk y esaki tabata tin di haber c'un celebracion,

esta e Dia Internacional di Derechonan di Mucha cual a wordo celebra cu un parada di 'Super Heroenan'.

            Liberato Hoek, Hefe di Departamento di Ambulans di ImSan a duna di conoce cu ImSan conhuntamente cu Cuerpo di Polis y Brandweer  a organisa e 'Super Heroes Parade 2023' pa di seis biaha.

            Ta un esfuerso di diferente departamento manera Crisis Management Office (CMO), Kustwacht, team di deporte di Tang So Do y di ATHA banda di otro instancianan cu a pone di nan banda pa haci esaki posibel pa e muchanan.

            Door cu tabata dia di mucha kier a haci algo toch diferente pa nan mirando cu hopi biaha e departamentonan aki ta bay scol duna informacion y haci demostracion, pero kier a trece esaki di un otro manera pa purba inspira e muchanan, Hoek a indica.

            A scoge rond di 6 scol ya cu tin te cu 1 pm pa bishita nan banda di e hecho cu e ekiponan tambe ta ariba caminda.

            El a gradici Dr. Rajnherc cu a sostene e proyecto y tur e otro departamentonan.

            Rino Hermans, Director di CMO a splica riba e importancia pa haci e demostracion aki na e muchanan.

            El a bisa cu mester cuminsa inculca e aspecto di seguridad den e muchanan y cu si algo bay fo'i man tin e departamentonan concerni pa duna asistencia.