Muchanan a bati record den 'strider' categoria edad: 2-3 aña, 4-5 aña

Na Seroe Cristal a tuma lugar e “Twelve Hours Mountain Bike”

Recientemente a tuma lugar na Aruba e actividad “Twelve Hours Mountain Bike” cu tin nuebe aña consecutivo cu ta wordo organiza.

Silviene Vrolijk, coordinador, a comenta cu prome seis añanan el a tuma lugar na Alto Bista, y awo tin tres aña den Seroe Cristal.  El a bisa cu esaki ta un evento cu aña pa aña ta birando mas grandi; e aña aki tabatin atrobe striders, cu a cuminza 6’or Diabierna, y e “Kids Mount to bikes cu a cuminza 7’or di mainta, y asina nan a finaliza a cuminza cu e adultonan, pa 12 or di merdia te cu 12’or di anochi.

Un grupo grandi di hende ta tras di esaki, durante e nuebe añanan cu e ta tuma lugar, y nan ta traha dia y anochi pa haci cada bez e evento aki mas grandi. Silviene a bisa cu cada aña nan ta implementa cierto rutanan pa no keda semper mescos, y e aña aki, e tabata un exito rotundo atrobe.

El a splica cu nan tabata tin e famoso brug cu nan mes a bolbe traha, pues tur aña nan ta purba mehora y haci cambionan mas tanto posible, bin cu mas reto pa e coredornan.

Pa e grandinan tin duo, team di cuater, team di seis, team mix di cuater, team di seis hende muher, y esey ta e intencion: un evento pa famia, amigonan, cu ta bin fun pa 12 ora largo.

Silviene a splica cu e chikitonan tambe a strider e aña aki, e aña aki nan a kibra un record: tabatin 21 strider den categoria di 2 pa 3 aña, y 4 pa 5 aña. “Bo ta bisa increible wak e muchanan aki con nan ta bezig cu nan strider, nan ta yam’e eigenlijk ‘balans bike’ anto con activo e muchanan aki cu dos aña ya caba bo ta enjoy cu nan, nan ta gewoon biba e momento y a traha un trayecto cu nan por a core tambe” Silviene a declara, y a acentua cu nan ta hopi contento cu e reaccionnan y cu mayornan tambe ta hinca input cerca e muchanan, pasobra asina bo ta cuminza. Y, pa nos ta un satisfaccion pasobra nos por wak cuanto ciclista nos tin e aña aki, atrobe”, Silviene Vrolijk a subraya.