Minister Ursell Arends, titular di Transporte y Integridad:
*Refiriendo na traspaso di vergunning
ORANJESTAD (AAN) – Diaranzon mainta, Minister di Transporte señor Ursell Arends, den su calidad di titular di Transporte y Integridad, a yama un conferencia di prensa tocante e impase cu tin entre su persona y e gremio di taxistanan.
Manera ta conoci e taxistanan a dicidi di drenta den accion Diamars di mainta te atardi laat, unda a cera camindanan crucial pa trafico, y a crea un caos na diferente caya principal, contal di protesta.
T’asina cu nan ta reclama pa un derecho inherente den nan vergunning, cual nan a adkiri for di hopi aña atras aki, y cu segun nan percepcion e minister a trapa riba esaki.
Minister Arends a cuminza pa bisa cu e traspaso di vergunning ta un di e motibonan pa cual el a yama e conferencia di prensa aki. El a gradici miembronan di prensa presente y tur ciudadano cu ta sintoniza su rueda di prensa, p’asina nan conoce e otro banda di medaya, di loke a tuma lugar e ultimo oranan cu e protesta di e taxistanan.
“Di con nos a yega akinan? Pasobra nos a permiti un cartel corompe e sistema, a corompe e proceso aki y awo nos ta wak na unda esaki a conduci” e dignatario a señala.
E temanan cu Minister Arends a enfoca riba nan, ta: e preocupacion di e taxistanan, con nos a para fuerte p’asina combati corupcion den e sistema interno di traspaso, y alavez percura pa oportunidad igual pa tur ciudadano cu kier yega na un vergunning di taxi, pa nan por logra haya esaki tambe.
“Mi ta kere cu, mas cu claro, tur hende ta puntra: ‘di con mester a tuma e decisionnan aki?’ Mester a bin cu mas control pa loke ta trata reparticion di permiso y den e cantidad di asientonan, considerando tambe e sorto di turista cu nos ta haya, tambe ta ricibi famianan segun e mesun taxistanan. E tema cu tambe mi kier a para un rato riba dje ta ‘integriteit’ risico, mirando cu mester a tuma decision, a base cu ya dia 22 di April 2021, e Minister di Transporte di e tempo eynan, a introduci un maneho flexible unda cu a haci cu ‘extended family’ tambe por yega na remarke pa por haya un vergunning, pa por traspas’e na un hende cu si a traha dos dia pa bo caba como chofer auxiliar, ta yega na remarke tambe; of un hende conoci cu bo tin relacion cu ne, por yega na traspaso di vergunning”, Minister Ursell Arends a relata.
