Monitor di desastre di petroleo den Bahia Morrocoy pa Refineria El Palito

E modelonan no ta dunando un conclusion di impacto pa ABC

ORANJESTAD (AAN):  Organisacion di Maneho di Crisis (CMO) a duna di conoce cu despues di e incidente reciente na Refineria El Palito, caminda un derame di petroleo a sali den Bahía Morrocoy, CMO hunto cu Havenmeesters di Curaçao, Bonaire y Rijkswaterstaat, a cuminsa monitor cu mucho cuido e situacion.

   E team aki ta traha riba desaroya model pa evalua e posibel impacto riba ABC, tene na cuenta patron di biento y coriente.                                 

  Actualmente, e modelonan no ta dunando un conclusion di impacto pa ABC, pero e team ta keda alerta y ta sigui monitor e situacion y sigi cu modelo di impacto.

   Progreso di un Desastre di Petroleo: For di Mancha te Teerball Un desastre di petroleo manera esaki ta pasa diferente fase prome cu e petroleo degrada completamente:

   Di biaha despues di e incidente, e petroleo ta distribui riba e superficie di lama. E densidad y e tamaño di e mancha di petroleo por varia dependiendo di e cantidad di petroleo cu a bay afo, e temperatura di awa y e condicionnan di tempo.

   Vaporacion y Formacion di Emulsion: Apenas e petroleo yega na superficie di lama, e fraccionnan mas liviano ta cuminsa vapora rapido, specialmente den temperatura halto. E proceso aki por resulta den un reduccion significativo di e volumen di e mancha di petroleo. Mesora, e petroleo por absorbe awa, formando un emulsion di awa den petroleo, cu ta yama ‘chocolate mousse' pa motibo di su grosura y color.

   Dispercion y Solucion: Cu tempo, e mancha di petroli ta sigui dispersa natural of door uza solucionnan kimico pusha pa biento y coriente. E petroli ta bira mas delega y un parti di dje lo disolve den e awa. E componente cu por disolve ta mescla cu e awa, reduciendo e concentracion di petroli den e awa.

   Oxidacion y Descomposicion Biologico: Oxidacion ta tuma luga ora e petroleo ta drenta contacto cu oxigeno den aire y den awa. E proceso aki ta kibra e hidrocarburo den e petroleo na substancianan mas chikito y menos dañino. Mesora, bacteria y otro microorganismo ta cuminsa descompone e petroleo di manera biologico, cu ta un parti importante di e proceso di restauracion natural.

   Formacion di Teerball: Cu tempo, e fraccionnan mas pisa di e petroleo cu no a vapora of disolve, por forma teerball. E bolnan chikito, por flota of hunga den olanan depende di nan densidad. E Teerballs por eventualmente yega riba beachnan y barancanan na costa di Aruba, pero nan ta considera menos dañino cu petroleo fresco.

   Monitor y Accionnan Futuro Aunke e modelonan actualmente no ta pronostica un impacto concreto pa ABC, e team combina di CMO, Havenmeesters y Rijkswaterstaat ta keda activo pa monitor y actualisa e situacion. Si ta necesario, accionnan adicional lo tuma luga pa minimalisa e impacto ambiental.

   Ta spera cu e petroleo lo sigui degrada den e proximo dia pa proceso natural, cu ta reduci e posibilidad di daño ambiental di duracion largo. Sinembargo, ta importante pa keda alerta y prepara pa cualke cambio den e situacion.

   E potret aki ta di un lek di petroli cu a keda detecta na Mitare, na estado Falcon banda zuid.  El a bin di tuberianan grandi cu a lek.  PDVSA mientras tanto ya a drecha e leknan aki.