Modelonan special di Aruba a aparece riba 'billboard' na Times Square, New York

ORANJESTAD (AAN): Diasabra 19 di September, cuater modelo special di “Sea Bunita Sea Bo Mes” a sali ariba e pantaya gigantesco (billboard) na Times Square, New York.

Esaki a wordo estrena mientras cu miles di persona por a wak Shawndré Geerman, Regina Janga, Jaydrick Clement y Sara Mora Contreras durante e evento cu National Down Syndrome Society ( NDSS) a organisa riba Times Square na New York pa 2021.

Anualmente NDSS ta recorda riba e “cariño special” cu personanan cu Down Syndrome ta influencia den comunidad.

Durante un presentacion riba e pantaya gigante (billboard) ariba Times Square na New York, 500 persona cu ta consisti di mucha te cu adulto cu Down Syndrome a wordo presenta. E video ta un forma di recorda y contribui logronan y balor cu personanan cu Down Syndrome tin den comunidad.

E meta di NDSS ta pa crea concientisacion, aceptacion y inclusion pa e personanan cu tin Down Syndrome.

Diasabra hopi famia a bin for di tur skina di mundo y a topa na New York pa participa den diferente evento cu a wordo organisa pa NDSS. Debi na e “pandemia”, atrobe e encuentro tabata diferente.

Despues di mustra e video riba Times Square tur participante a asisti na diferente evento virtual cu e organisacion a presenta. Tabata tin entre otro un ceremonia di apertura “virtual” di NYC buddy Walk, un fiesta pa entrega di premio.

Tur esaki a wordo transmiti vitualmente na mas cu 150 ciudad na Merca y tambe den diferente parti na mundo caminda mas di 325 mil persona a conecta via di internet.

Apesar di e crisis di pandemia NDSS toch a logra organisa e evento special aki unda Shawndré, Regina, Jaydrick y Sara di Aruba y tur otro persona cu Down Syndrome por a participa. Esaki sigur ta un tremendo logro pa Aruba.