Informacionnan presenta pa DIARIO a haya contesta positivo
- Den e situacion mundial di inflacion prijs di cas ta central
- Sin dak riba su cabez hende no por sobrevivi bida diario
ORANJESTAD(AAN)- Vivienda ta uno di e problemanan social mas grandi cu Aruba conoce.
Esaki ta e loke a bini dilanti den articulonan presenta pa DIARIO a base di informacionnan directo di Pueblo riba e situacion diario cu cu e Arubiano ta confronta.
Manera DIARIO awor ta comprende, Ministro Geoffrey Wever a dicidi pa un investigacion entorno e peso di prijs di vivienda cu a subi enormemente y a sigui subi a base di e competencia cu un ala nobo den turismo ta representa.
Despues di reclamo y investigacion di DIARIO, Aruba a ricibi confirmacion di desaroyonan cu ta mustra con e costo di bida di e Arubiano ta wordo afecta dor di e prijs di vivienda a base di competencia di supuesto turismo.
Un competencia cu ta afecta e cantidad di proyectonan organisa cu ta brinda como centro turistico chikito, tur comodidad na e turista.
Un competencia sumamente peligroso pa turismo como industria principal di e pais, pasobra na varios ocasion segun informantenan, loke turista ta ricibi no ta wordo controla pa e nivel di seguridad ni loke na acomodacionnan oficial ta wordo exigi.
Con cuminda ta subi mesa na e acomodacionnan barata, ta bini dilanti den relatonan cu ta indica cu no tin control di higiena por ehempel, cu tambe ta conta pa e medidanan cu establecimentonan inscribi y reconoci, cu mester evita cu por ehempel malesa ta haya espacio pa bira rey dor di falta di control di bishitante of ciudadano cu ta atende scondi cu turismo.
E factor hopi peligroso pa tur Arubiano ta, cu prijs di cas ta subi enormemente debi na e demanda cu ta crece pa medio di personanan cu por bishita Aruba na un prijs barata pero ta afecta e bida di e Arubiano cu ta mira con e cas cu por ta su vivienda, ta wordo transforma den un camber inoficial pa turistanan.
Mientras Ministro Wever a anuncia publicamente cu e ta bay actua, mas informacion a drenta na DIARIO entorno peliger cu ta existi den falta di control di e abuso cu ta wordo haci di e sistema moderno pa acomoda turista.
Personanan cu no conoce e proteccion legal cu tur ciudadano y bishitante tin na Aruba, ta wordo perhudica dor di circumstancianan presente na e acomodacion pa cual nan ta paga. Sinembargo, nan no tin forma pa presenta nan reclamo.
Informantenan di DIARIO ta sumamente satisfecho cu e situacion a haya atencion di Ministro Geoffrey Wever, cu tin aki un nucleo di diferente problema serio riba tereno social y economico pa atende.
