Ministro orguyoso cu saconan biodegradable di Arubiano y Santa Rosa

ORANJESTAD (AAN): Diadomingo ultimo a tuma lugar un otro exitoso Mercado di Santa Rosa combina cu festival di cuminda Crioyo

cual semper ta un aspecto hopi gusta durante e mercado nan ya existente pa hopi ana. Hopi cunukero of empresario nan exitoso awendia, a inicia cu nan producto nan na Santa Rosa y esaki ta e motibo prinicipal tras di cada mercado, esta pa aporta na e crecemento y sosten na nos entrepreneur nan activo den nos Sector Primario.

   Durante un mercado completamente jen di bishitante y productor nan local, Minister Arends a tuma e oportunidad pa introduci dos producto nobo den forma di saco nan bio degradable cu lo no forma un peliger di contaminacion pa nos medio ambiente. Esaki ta tuma lugar hunto cu Señora Eveline Wever, di Product Development & Marketing pa Arubiano marca nacional y Señora Nathalie Maduro, Director di Santa Rosa.

   Esaki ta un initiativa cu a Sali for di e compania local Arubiano, kende nan ya ta aportando cu saco nan di compras cu ta ilustra e beyeza y importancia nos flora y fauna. Pero den e caso aki, nan a wak e necesidad pa tambe aporta cu saco nan reusable y eco friendly cu por contribui na nos Seguridad di cuminda, stimulando asina nos futuro generacion encuanto di e importancia di planta. E saco nan ta consisti di un saco re- sealable chikito cu lo worde intoduci pa venta di simiya y producto nan di fertilizacion di tera como tambe un saco reusable mas grandi pa venta di gordura. E idea ta cu na momento cu bo cumpra e saco nan aki, bo por reusa nan ora di bin cumpra fertilizante, simiya of gordura, nan ta hana e producto nan na un prijs mas economico. Asina tambe nos ta evita e gasto di mester cumpra saco nan pa empaketa producto den un forma sustenibel. E saco nan tin un mensahe pa concientiza nos pueblo ariba e importancia di planta.

Arubiano bag ta e prome saconan biodegradable cu e sustitui e uso di saco plastico na Aruba y awor e mensaje lo promove agricultura na den tur hogar cu e saconan aki. Desde mucha, pa hende grandi.

   " Starten bij jonge generatie leidt tot cultuurverandering".  Alavez, Santa Rosa mes ta bezig cu algun test cu cuminda di bestia den forma di empake comprimi cual lo contribui pa laga e alimento empaketa cu ta consisti di diferente tipo di mata y yerba local, pa uso den future. Esaki ta algo cu sigur lo aporta cu cuminda di bestia, durante e temporada nan di secura.

   Durante e mainta, e Mercado di Santa Rosa a conta tambe cu presencia di Sr. Ir. Gabriel Murray y Sr. Ing. Gerritson Doran, kende nan ta di bishita den cuadro di e cooperacion entre e isla nan ABC y isla ariba. Nan a keda sumamente contento di experencia e Mercado y pa nan tambe por introduci e modelo aki durante nan actividad nan agrario na LVV Curaçao. Durante e mainta, nan a combersa cu diferente di e productor nan presente y nan a keda sumamente impresiona cu e diferente producto nan disponible durante e mercado y cuanto producto Aruba ta produciendo. Nan lo haci bishita tambe na diferente Cunucu pa por hana un impresion mas extenso di kico tur ta e diferente proyecto nan agrario cu nos isla ta conta cu ne.

   E mercado a conta cu diferente persona conoci den e mundo agrario y un persona cu tambe a bishita ta Sr. Romulo Geerman, un baluarte reconoci door di Gobierno pa su esfuerzo nan den criansa di bestia y kende tabata contento di mira e desaroyo nan andando den Santa Rosa. Entre esnan cu tabata presente, tabata tin diferente otro Amigo nan conoci manera Jimmy Ramos, Pettite Greens, Sr. Arie Lichtenstein di The Land Farm cu despues di basta tempo a inicia back y tabata tin diferente producto fresco pa ofrece. Esnan cu a bishita e Mercado a disfruta di un mainta di dushi ambiente bou di e mata nan di fruta y cu e bon musica di Grupo Stimami.

Pa medio di esaki, Minister Arends encarga cu nos Sector Primario conhuntamente cu henter e team di Santa Rosa ta gradici tur nos productor nan cu a bin bende y aporta na e exito di e Mercado di Santa Rosa como tambe na tur nos Amigo nan cu a bin pa haci compras y pasa un rato ameno hunto cu nan famia.

“Sostene nos cultura, practica cria, pesca y agricultura.”