Ministro a firma pa Fase 3 di proyecto di Camera y ta satisfecho cu logronan

Operation Command Center lo bin na Savaneta

• Esaki ta encera instalacion di 40 camera mas
• Casi tur rotonde lo bay haya camera tambe 

ORANJESTAD (AAN): Tabata Diamars merdia, cu Ministro di Husticia Rocco Tjon hunto cu Director di NV Elmar, Anthony Irausquin a firma oficialmente un convenio pa asina sigui amplia e proyecto di Security Camera.

   Segun Ministro, e plan di maneho di Ministerio di Husticia ta pone enfoke pa inverti den tecnologia y innovacion.  Di aña pasa caba nan a cuminza inverti den proyecto di cameranan.  Gobierno a aproba diferente fase, y ya caba full e area di Hotel, e area banda di Lama, y e zona conoci como Hot Zone ta equipa cu camera.  A aproba tambe e siguiente Fase cu ta ciudad di San Nicolas.

   Camera pa 40 lugar rond Aruba: Durante temporada di Carnaval, tabata un momento perfecto pa evalua e proyecto piloto aki cu tur stakeholder.  Tur partner tabatin reaccion positivo, y pesey tambe awor cu NV Elmar a firma pa e Fase #3, unda lo instala camera na 40 localidad strategico rond di Aruba.

   E decision unda cu ta pone camera a wordo tuma door di varios stakeholder di Husticia y Polis mes, y di e forma aki amplia seguridad pa ciudadanonan y pa turistanan.

   Ministro Tjon a gradici tur esnan cu a haci esaki posible, como cu e tabata un proceso amplio unda cu un grupo di trabao di Cuerpo Policial hunto cu un grupo di trabao di NV Elmar a dicidi unda lo instala e cameranan na e 40 lugarnan strategico aki, teniendo na cuenta cu informacion cu Polis ta dispone di dje, pa asina e cameranan aki wordo poni na puntonan unda nan lo bay tin un balor agrega pa di e forma ey combati criminalidad mihor, y obviamente tin di tene cuenta cu parti tecnico y aki NV Elmar tabatin un rol importante.

   Expertonan satisfecho cu camera: Pa a drenta den e proyecto aki, a logra reuni un cantidad di experto di camera, di ICT, di comunicacion, encuanto sistema di PTZ di camera, y asina a bin cu e mihor pa Aruba.  Y como cu NV Elmar ta e unico cu tin un smart-grid, tabata facil pa conecta e cameranan aki riba e red di electricidad.  Pesey NV Elmar awor por instala cada camera den un promedio di 10 minuut, y e coneccion di camera ta bay automaticamente.

   Borchi di advertencia: E zonanan cu lo haya camera, ta cu a tene cuenta cu zonanan cu tin establecimento nocturno, y a tende cu tur e rotondenan na Aruba, pasobra den e forma aki si acaso tin un incidente, semper tin cierto rutanan cu e malhechornan ta bay frecuenta, y di e forma ey tambe cameranan na rotonde lo yuda Polis pa combati criminalidad.

   Den simannan venidero, tur e borchinan di advertencia pa bo sa cu e area ey ta cubri pa camera, lo wordo instala.  Segun ley, e ponemento di borchi ta un obligacion tambe.  Pues abo como ciudadano ta wordo avisa cu tin camera cu ta vigilando bo y e area rond di bo.

   E dianan aki e cameranan lo wordo vigila for di un Centro na Wayaca, pero trabao ta andando pa Aruba haya un ‘Operation Command Center’ hopi avanza cu ta wordo construi den ex-Bestuurskantoor di Savaneta.  E centro aki ta wordo traha cu capacidad pa sigui aumenta camera bay goal riba e sistema.

   Ya caba camera ta yudando: Ministro Tjon ta convenci cu e prome fasenan di e camera ya caba a trece fruta.  Manera el a indica cu recien el a duna den Parlamento, e cifranan di criminalidad ta prueba di esey.  A mustra cu tin un reduccion drastico den incidente di crimen.

   Cu Fase #3 tambe a start e construccion di e Operation Command Center na Savaneta cu ta un proyecto cu ta wordo ehecuta hunto cu Setar NV.  Den e edificio aki lo tin personal di diferente departamento pa hunto di e forma ey por percura pa esaki ta operando 24 ora pa dia.

   Ministro a bisa cu ta importante cu Gobierno ta inverti den tecnologia pero na mes momento ta tene cuenta cu e factor humano, pasobra na final di dia tur e imagennan aki cu ta wordo capta tin di wordo analiza y tin di wordo comparti cu tur e diferente departamento hudicial, teniendo cuenta cu tur regla y rekesito cu Cuerpo Policial lo bay exigi.