Prome Minister Evelyn Wever - Croes:
ORANJESTAD (AAN): Durante Conferencia di Prensa di Gobierno di Aruba diaranson 31 di juli mainta, Prome Minister Evelyn Wever-Croes a elabora riba e Protocol cu Ministerio Publico y Departamento di Recurso Humano tin ya desde 2005. Prome Minister ta referi na un caso specifico na unda cu oposicion ta purba atacha su nomber bisando cu e ta mete den Ministerio Publico.
“Ta straña mi cu e politiconan aki ta zwaai cu cantidad di papel pa bisa cu mi ta mete den Ministerio Publico pasobra Ministerio Publico y Departamento di Recurso Humano tin un protocol ya desde 2005 y e politiconan aki tawata minister e tempo ey caba, y a traha cu e protocol y mester conoce e protocol”, Prome Minister a remarca. E protocol aki a wordo aplica den tur investigacion cu a tuma luga, ta tumando luga y cu lo tuma luga den futuro tambe pasobra ta proceduranan standard. E protocol aki a wordo aplica den casonan manera IBIS, Avestruz, Flamingo y Kukwisa. Esaki kiermeen cu no ta nada nobo sino proceduranan standard. E persona en cuestion tawata un sospechoso pa Ministerio Publico den caso Kukwisa. Y ta e propio Parlamentario Marisol Tromp a declara cu e director di DIP e tempo ey lo a entrega un keho falso contra su persona.
Prome Minister a duna di conoce cu na e momento cu un empleado publico ta un sospechoso pa Ministerio Publico, e no ta algo di Ministerio Publico (OM) so, e ta bira algo cu ta concerni Departamento di Recurso Humano (DRH) tambe, pasobra e tin di haber cu e situacion disciplinario di e persona y e integridad di e persona. Den un caso asina, e protocol ta indica cu OM y DRH tin contacto cu otro riba cierto asuntonan, no riba e investigacion criminal pero si riba cierto informacion cu ta importante pa e caso disciplinario. Ora cu OM dicidi di seponeer un caso, esta di no sigui persigui e persona manera tawata den e caso aki, e ora nan ta informa Gobierno pa locual ta importante pa e caso disciplinario.
Den e caso aki ta e propio Marisol Tromp a anuncia cu e director aki a entrega un keho falso contra su persona y p’esey e caso Kukwisa a cuminsa. Y door cu e keho tawata falso, e caso a wordo cera y Marisol Tromp no ta un sospechoso mas despues di dos aña.
Pues logico ora un director di un departamento cu ta wordo acusa di a entrega un keho falso contra su ex-minister, e ta algo cu mester haya atencion. Ademas, e caso disciplinario cu ta andando aworaki ta basa riba varios otro aspecto. Awo, cu e persona en cuestion a dicidi di comparti e informacionnan aki cu politiconan oponente pa haci politica barata cu nan, esey, Prome Minister a subraya, ta keda pa nan cuenta.
“Pero nos di nos banda, ta haci nos trabou manera mester ta. Y ora bo ta kere den integridad bo tin cu actua cu integridad, irespecto ken e ta. Mi ta rechasa y condena e atakenan inhusto y infunda di e politiconan aki contra Ministerio Publico y Departamento di Recurso Humano y contra mi persona. Desde cu Gabinete Wever-Croes I a sinta, integridad a wordo poni central y nos departamentonan sa esey. Y ora un ambtenaar comete algo ilegal, tin consecuencia p’e. Sea ta consecuencia criminal of penal den man di OM of disciplinario den man di DRH. Esakinan ta proceduranan standard.
Mi ta lamenta cu cierto politiconan, cu pasobra nan ta wordo investiga of pa scapa nan peyeho, ta ataca institutonan importante di nos pais y ta tilda tanto OM como mi persona di ta actua fout. Mi mensahe na e politiconan aki ta pa nan bira mas serio y acepta nan propio responsabilidad pa nan propio actonan y cuminsa respeta institutonan importante di pais Aruba”, Prome Minister a enfatisa.
