Magaly Brito, Secretaria General SEPPA:
*Dunador di trabao tin cu respeta nan derecho!
ORANJESTAD (AAN)—Den entrevista cu Magaly Brito, Secretaria General di SEPPA (Sindicato di Empleadonan Publico y Priva), siguiendo cu e tema di e derecho di indexering pa werksternan, el expresa cu mester tene cuenta cu na momento cu e problema aki a surgi, hopi di e trahadornan aki a disgusta y retira, pero e problema awo ta cu no a busca reemplazante pa nan, y e presion ta hopi pisa riba e trahadornan aki.
“Esaki ta un discriminacion hopi grandi; e ta un tristeza pa un donador di trabao tin cu keda bringa su trahadornan den Corte, pa unicamente cu loke nan ta buscando ta pa respeta nan derechonan, pasobra nan ta cumpli tur dia cu nan trabaonan. Asina mes cu nan ta wordo trapa pa nan dunador di trabao nan ta bay cumpli, y asina mes nan ta keda cu e forza pa lucha pa defende e poco derechonan cu nan tin y cu ta busca tur manera pa wordo kita for di nan”, asina Magaly Brito a señala.
Brito a indica cu, den e caso aki, SKOA ta un fundacion riba su mes, e ta un dunador di trabao riba su mes, y Minister di Labor tambe por yama e partidonan y bisa cu nan no por sigui asina aki, cu mester respeta derecho di e trahadornan. Pero di otro banda SEPPA ta compronde SKOA, pasobra e colega di Minister di Labor, esta Minister di Enseñanza no ta pone fondonan pa nan por paga e trahadornan, anto SKOA no por bay hacie.
“E ora ey nan ta keda sin duna e trahadornan nan derecho, y unico caminda cu ta keda e trahado ta busca nan derecho na Corte. Nos tabata tin e aña aki, un resultado caba, cu Huez a bisa cu si, e ta reconoce cu e trahadornan tin e derecho y cu mester cuantifica e daño pasobra a pasa un tempo caba, y esey ta den proceso aworaki. Pero e no ta kita afo cu e dunador di trabao tin cu cuminza duna e trahadornan nan derechonan bek. Y no kere cu e derechonan aki ta bay cambia den un siman di placa, pasobra na final ta condicionnan secundario cu tur trahador mester di dje pa por sobrebibi”, Magaly Brito a conclui.
