Enfoke riba transparencia y forma di traha
ORANJESTAD (AAN): Despues cu abiertamente a declara den Parlamento di Aruba cu pueblo ta indigna, porfin riba Diahuebs un boletin a wordo emiti door di Ministerio Publico. E boletin a bin faltando apenas 3 dia prome cu e caso ta cumpli un luna.
Manera ta conoci, e hoben Ayden Lanoy a ser tira mata durante un acto cu pueblo ta describi como ‘violencia excesivo’ di Polis. Despues a bira indigna ora cu tabata parce comosifuera cu Husticia na Aruba ta busca tur forma pa sconde detaye di loke a socede e marduga di 9 Februari 2025 na Madiki Kavel.
Boletin nobo asina: Ministerio Publico a nota cu den comunidad ta existi indignacion pa e falta di transparencia den investigacionnan penal. Tambe a nota cu no semper comunidad tin comprension pa e tempo cu autoridadnan ta tuma pa investiga.
Ministerio Publico mester tene cuenta cu varios interes den un investigacion. Sigur den e fase inicial un investigacion generalmente no ta duna espacio pa divulga informacion tocante e contenido. Door di haci declaracionnan tocante un investigacion cu ta andando, testigonan (por ehempel) por worde influencia y esey ta perhudica e buskeda di e berdad.
Ministerio Publico mester tene su mes na su obligacion legal di confidencialidad. Ademas ta asina cu victimanan of nan famia y tambe sospechosonan tin derecho riba proteccion di nan privacidad. Pa e motibonnan ey Ministerio Publico generalmente no ta divulga nombernan of potretnan di e sospechosonan ni di e victimanan. E no ta pa ta misterioso, sino pa proteha privacidad di tur esnan involucra.
Investigacionnan penal sa dura largo. Esey por ta debi na e hecho cu ta trata di un investigacion complica of pasobra mester haci investigacion tecnico. Un investigacion tecnico por tuma hopi tempo, especialmente si ta investigacion tecnico complica cu mester worde haci pa NFI (Nederlands Forensisch Instituut, Instituto Forensico) na Hulanda.
Ta bin acerca cu capacidad di Ministerio Publico ta limita, pasobra (entre otro) no tur funcion den e formacion di Ministerio Publico ta cubri, debi na insuficiente presupuesto disponible. Door di esaki Ministerio Publico ta bin ta lidiando añanan largo caba cu un falta structural di personal.
E mesun cos aki ta conta pa e otro partnernan den cadena hudicial y tin consecuencianan pa e cantidad di investigacion cu por worde haci y pa e periodo den cual nan ta worde hiba.
E boletin a finalisa asina: No obstante, Ministerio Publico lo sigui traha incansablemente pa un sociedad husto, semper teniendo cuenta cu e interesnan di e victimanan, e famia y e sospechosonan.
