Abogado ta señala den caso di tiramento
ORANJESTAD (AAN): Diahuebs mainta, abogado mr. Hernandez a reacciona riba e exigencia di Fiscal di 7 aña di prison pa su cliente, e hoben C.H. di 18 aña. E abogado a bisa Hues cu C.H. a actua den defensa propio y mester declara C.H. liber. Den e articulo aki, DIARIO ta publica e defensa di abogado y den un otro articulo ta publica e caso y exigencia di Fiscal. E potret aki ta saca riba e dia di sucedido, ora cu Polis y Recherche a core bay tene un razzia na un cas na Dakota relaciona cu e tiramento.
Actua den defensa propio: mr. Hernandez a bisa Hues cu C.H. a admiti di a tira riba e auto. E abogado ta haya cu no por exclui e posibilidad cu C.H. a actua den defensa propio.
E abogado a mustra cu e dama D., cu tabata sinta den e auto banda di e chauffeur, a bisa cu tabatin un discusion den e auto y e homber lomba sunu a bisa C.H. y L. sali for di auto y a saca arma pa nan. E abogado a remarca cu e dama D. a nenga di bisa kende e homber ta.
Polis no a sigui investiga: E abogado a sigui bisa Hues cu e homber chauffeur di e Toyota, a nenga di hiba e dama D. hospital y tambe a nenga di yama 911 di Emergencia. E abogado a cuestiona e hecho cu Polis no a sigui haci investigacion kende e homber lomba sunu ta.
Na opinion di mr. Hernandez, e dama D. a nenga di bisa kende e homber ta. C.H. y L. a bisa cu e homber lomba sunu a saca arma riba nan y kier a kita placa for di nan. E ora ey e dos hobennan a lucha cu e homber y a core bay. Na opinion di abogado, e no ta mustra logico cu ta C.H. y L. a horta e homber sino cu ta e homber a faya den su ladronicia y kier a tuma venganza. C.H. tabatin arma cun’e pa ta sigur y a tira ora el a mira e homber saca arma pa nan.
E abogado a bisa Hues con por ta imposibel cu C.H. a tira riba e auto y e glas no a kibra. Esey ta mustra cu e glas di auto tabata habri y no manera cu ta bisa cu e glasnan di auto tabata sera. E abogado ta haya cu contrario na Fiscal, aki por papia di cu C.H. a actua den defensa propio ora cu e homber desconoci a dirigi arma riba dje.
Aplica ley hubenil: E abogado ta haya cu mester declara C.H. liber di haya castigo. El a pidi Hues pa tene cuenta cu ta promer biaha cu C.H. ta cay sera. E abogado a bisa cu ta duel C.H. loke a sosode y cu C.H. ta dispuesto pa cay bou guia di Reclassering. El a pidi Hues pa aplica ley hubenil pasobra 4 luna promer, C.H. tabata 17 aña. E abogado a bisa cu C.H. su mama a fayece y C.H. kier bay Hulanda cerca su famia. Si e bay keda hopi tempo sera den KIA, esaki lo perhudica C.H. den su desaroyo.
Hues a bisa cu e ta bay studia e caso y dia 14 Maart 2025 lo tin sentencia.
