ORANJESTAD (AAN) – Den conferencia di prensa pa clausura e di 4 Vacunathon, cu a tuma lugar e fin di siman aki, Diasabra 11 y Diadomingo 12 di September, Minister Dangui Oduber a sigui declara:
“Mi por conclui cu nos a yega casi 3 mil persona vacuna durante e dos dianan aki, y esaki ta pone cu na e momentonan aki nos ta yegando na casi 75% di nos poblacion riba 12 aña, cu a haya nan di dos shot. Kiermen, nan ta bon proteha pasobra manera ta conoci, despues di bo di dos shot e ta hisa e eficiencia di e vacuna di Pfizer te cu 94% y nos ta sumamente satisfecho con e Vacunathon aki a bay”, Minister Dangui Oduber a señala.
Minister Dangui Oduber a subraya cu esaki no tabata un esfuerzo solamente di Ministerio di Salud, pero tin cu gradici DVG y señor Chris Goedhart, cu ta un di e pushers di e Vacunathon aki for di comienzo. Tambe e dignatario a gradici tur empleado di Ministerio di Salud, pero tambe SVb, AZV, Rotary Club, Wit Gele Kruis, POHarts, ImSan, Rotaract Club, Arubus, entre otro, y sigur Ritz-Carton cu semper ta pone su ballroom disponible, pa nos por a organiza ya caba cuater Vacunathon.
“Nos lo sigui haci hopi esfuerzo, nos tin cu yama esaki e ultimo push pa nos por yega rond di 85% di hende vacuna, pa nos por crea e herd immunity, y nos falta alrededor di 11 mil persona pa vacuna. Kiermen, nos empeño ta keda pa sigui pusha, pa nos por logra convence ainda e grupo cu no a vacuna. Nan por tin nan motibonan pakico no a vacuna, pero nos ta sigui cu nos campaña di concientizacion y sigui brinda informacion di e resultadonan cu e vacuna ta duna cada ciudadano cu ta vacuna. Nos ta mira esaki den e cifranan na Hospital con e porcentahe di esnan cu ta worde hospitaliza cu no ta vacuna ta riba 85%, y cu a fayece desde 1 di Juli te cu 31 di Augustus, 85% di nan no tabata vacuna. E mensahe ta cu e vacuna ta duna e resultado cu nos tabata buscando, kiermen, tur esnan cu no a haya oportunidad pa vacuna e fin di siman aki, Ministerio di Salud conhuntamente cu DVG, ta bay keda haci esfuerzo pa wak si nos ta bay considera un di 5 Vacunathon, of con nos ta alinea strategia pa nos por yega mas cerca posible di e ciudadano pa asina nos logra e meta cu nos a pone, desde comienzo, esta yega na 85% di e poblacion vacuna. Nos ta sumamente satisfecho con e fin di siman aki a bay, y cu esaki nos tin 3 mil persona adicional, cu ta bon proteha y mas cuida. Esey ta e meta pa nos cuida e salud di nos ciudadanonan, evita cu nan ta worde hospitaliza, y evita cu nan por fayece a causa di covid-19”, e mandatario a señala.
El a señala cu e situacion ta mehorando un tiki, den e ultimo dos pa tres siman, den sentido cu e cantidad di casonan ta bahando, mescos cu e cantidad di hospitalizacionnan. No obstante esey, tin mas di 30 pashent cu mester a worde manda Colombia pa cuido, pasobra no tabata tin cama den UCI pa nan. Esaki ta pone un gasto hopi pisa riba e fondonan di AZV, pues mester percura pa nos ciudadanonan keda vacuna pa evita cu mas hende keda hospitaliza.
