Minister Wever ta subraya e necesidad di un framework robusto di indicadornan pa traha pa un desaroyo sostenibel

ORANJESTAD (AAN): Desde inicio di e Agenda 2030 di Desaroyo Sostenibel di Nacionnan Uni, e “Sustainable Development Goals” (SDGs) na 2016,

Aruba a compromete su mes pa implementacion di SDGs na Aruba.

            Aruba a organisa su mes y a instala un Comision Nacional di SDGs pa duna direccion strategico y coordina e implementacion di SDGs na Aruba.

            Siguientemente e SDG-Indicator Working Group a wordo instala pa guia y coordina e proceso di monitoreo y evaluacion di SDGs y trece dilanti puntonan di atencion relaciona cu disponibilidad di data pa SDGs.

            E SDG-Indicator Working Group ta un colaboracion entre departamentonan gubernamental y semi-gubernamental. E werkgroep ta existi desde aña 2017 y den transcurso di e añanan a conduci diferente trabou relaciona cu produccion di indicadornan pa asisti e proceso di desaroyo, monitoreo y evaluacion di maneho pa desaroyo sostenibel.

            E SDG-Indicator Working Group a produci un rapport “Aruba Sustainable Development Goals Indicators 2021 – A report on new baselines and time series analysis”.

            E meta di e rapport ta pa presenta indicadornan nobo cu a wordo produci (nieuwe nulmetingen/baselines) y analysis di indicadornan desde aña 2000 (den caso cu data ta disponibel) pa asisti funcionarionan di maneho y “decision makers” den monitoreo di desaroyo di diferente area di desaroyo sostenibel y formulacion di metanan nacional concreto pa sigui traha riba implementacion di SDGs.

            E trabou haci ta encurasha pa mas analisis den profundidad ser haci y ta asisti den e preparacion di Aruba pa e “Voluntary National Review 2022” di Nacionnan Uni unda paisnan ta presenta nan progreso den implementacion di SDGs.

            E rapport ta obtenibel riba e website di Departamento di Asunto Economico, Comercio y Industria.

             “Como Minister di Desaroyo Sostenibel, mi ta encurasha trabounan cu ta aporta na desaroyo sostenibel”. “E rapport ta duna un representacion di desaroyo di Aruba relaciona cu areanan di desaroyo sostenibel. Mi ta encurasha pa mas analisis y investigacion wordo haci.” Data ta sumamente importante pa na Aruba nos planea di manera adelanta y riba termino largo, haci uso efectivo di nos recursonan limita y evalua e resultado di nos plannan y maneho di manera obhetivo y asina avansa desaroyo sostenibel na Aruba".