*Leynan laboral na Aruba mester reconoce y adapta na cambio climatico
ORANJESTAD (AAN): E siman aki Minister Arends a lansa un iniciativa pa cambia orarionan di trabou na Aruba. Esaki pasobra Aruba no ta scapa di cambio climatico na nivel global. Ya caba Aruba ta wordo asota pa olanan di calor y den futuro esakinan lo bira mas frecuente, mas intenso y nan lo dura mas largo. “E calor insoportabel aki lo bira pio den futuro,” segun e minister. “Entre promenan cu ta wordo afecta directamente tur dia ta nos adultonan mayor y nos trahadonan cu ta labora pafo sin sombra y sin e privilegio di tin un airco.”
Minister a indica cu nos leynan laboral a wordo traha den un otro decada. “Algun ta basa riba conceptonan di otro siglo y nan base ta modelonan economico anticua y cu no mas ta cuadra cu e tempo aki. Nos no por sigui traha cu leynan cu ta obliga trahadonan traha ora nan largo den solo y cu temperatura halto. Cambio climatico ta crea condicionnan inhumano,” Minister Arends ta enfatisa.
Minister a sigui bisa cu den leynan laboral na Aruba mester reconoce y adapta na e cambio climatico. “Nunca ta demasiado laat pa acepta e realidad nobo di nos mundo y cuminsa trece cambio. Pero e prome paso ta reconoce cu mester bin un cambio. Ora Arubianonan ta di acuerdo cu otro y nos pone un meta comun nos dilanti lo tin nada pa stop nos. Nos mundo ta cambiando y nos mester adapta na esey,” segun minsiter Arends.
E siman aki Minister Arends a invita tur sindicato na Aruba pa un reunion y tambe a convoca diferente gremio di sector priva pa cuminsa cu sondeo riba e tema di cambio na leynan laboral.
“Mi ta compronde cu tin modelo di negoshi cu semper a sali for di e punto di bista di cierto leynan laboral cu ta permiti cu nan por exigi trahadonan traha hasta ora e isla ta stobando. Pero esey no ta aceptabel mas. Den mi mes ministerio mi a cuminsa traha riba e cambionan caba. Cierto diensten ta bay traha a base di piket, pa mehora condicionnan laboral.”
“Di parti di mi ministerio nos a pasa caba den e proceso di ricibi informacion riba e tema aki for di autoridad internacional y awor nos kier scucha di stakeholders local. Esaki mester ta un proceso participativo y democratico. Un cos ta sigur, e leynan aki no por keda manera cu nan ta. Nos tur mester acepta y adapta na cambio climatico,” Minister Arends a remarca.
Recientemente Minister Arends a reuni cu e National Climate Resilience Council (NCRC), e autoridad na Aruba riba tereno di cambio climatico. E minister a pidi NCRC pa prepara y entrega prome cu dia 30 di augustus un ‘white paper’ den cual ta delinea e miho practicanan mundial pa loke ta adaptacion di leynan laboral pa efectonan di cambio climatico. Tambe pa indicia den forma concreto kico ta pasonan cu Gobierno di Aruba por tuma riba tereno laboral den cuadro di adaptacion climatico.
Minister Arends a sigura cu unabes cu e tin e asina yama “decision-critical information” e lo pone e tema aki riba agenda di conseho di minister. E informacion recopila lo enfatisa e necesidad pa cambio y lo duna indicacion kico por wordo haci. Pero pa trece cambio lo rekeri participacion activo di diferente minister y ministerio.
