Tyson Lopez, director ACF:
*A gradici y reconoce loke nan ta haci pa naturaleza
ORANJESTAD (AAN) – Dia 31 di Juli, a keda celebra e Dia Mundial di Park Ranger (World Park Ranger’s Day) y esaki ta e momento cu diferente pais na mundo, cu ta para pa conservacion di naturaleza, a gradici y reconoce loke e rangernan ta haciendo pa naturaleza. Asina director General di Aruba Conservation Foundation (ACF), Tyson Lopez, a duna di conoce.
TRABAO DI RANGER:
Tyson Lopez a splica cu e trabao di Ranger ta uno hopi diverso y complica, pasobra hopi cos ta pasa diariamente. En principio nan tey pa conserva naturaleza, pero logicamente ta bin bishitantenan y e Rangernan ta guia nan tambe, duna nan e bon informacion p’asina, eigenlijk, e comunidad siña respeta y duna e naturaleza mas amor y cariño.
E Rangernan ta semper ocupa pasobra constantemente tin cosnan ta pasa, entre otro molester cu boa, autonan cu ta dal un coneu, entre hopi mas. Parke Arikok no tin suficiente Ranger y tin cu wak con ta yega na fondo pa busca mas di e sirbidornan aki. Aworaki nan ta creando un team, poco, poco bek p’asina nan sigui haci nan trabao na un manera miho posibel.
“Mi ta bisa cu ta un proceso. Stap pa stap nos ta haciendo. Ora mi a drenta aña pasa, e intencion tabata, eigenlijk, pa nos por mehora e comunicacion, e confianza entre e trahadornan tambe, y esey ta locual nos ta haciendo tambe. Nos ta haciendo diferente actividad, internamente, tur cuartal nos tin un ‘town hall meeting’ interno pa duna un actualizacion di kico ta pasando, y kico ta biniendo pa e proximo cuartal, p’asina tur hende ta bon informa”, Tyron Lopez a señala.
El a comenta cu esaki ta un punto cu a bin dilanti na comienzo cu e informacion y comunicacion mester a mehora, y esey nan ta purbando mas y mas, pa comunica cu e empleadonan pa tur hende sa di e proceso.
SIGUI Y RESPETA REGLANAN:
Tyson Lopez a splica tambe cu pa ley, tur persona cu ta den un area proteha, mester sigui instruccion di e rangernan. “Bo mester sigui tambe e reglanan y instruccion cu nos tin skirbi riba borchi. Por ta den pasado no tabata asina conoci, cu e ta para den ley. Esaki ta algo cu nos ta bay traha cu nos rangernan pa nan tambe sa e leynan, con nan ta para, kico nan por haci y kico no, na unda nan por pas’e over, eigenlijk, na polis, pasobra eventualmente nos tin cu yama polis, si algo ta escala”, Tyson Lopez a señala.
Pero e Rangernan tin nan autoridad y mester sigui nan instruccion riba tereno di e parke, no solamente na Arikok pero den tur e areanan cu nan ta maneha, e ley ta prescribi esaki.
