Minister Ursel Arends cu lanzamento oficial di linea pa adulto mayor “125”

ORANJESTAD (AAN)—Den conferencia di prensa di Gobierno, Dialuna awo 3 di April 2023,

Minister Ursel Arends, titular di Transporte, Naturaleza, Integridad y Asuntonan di Adulto Mayor, a elabora tocante e lanzamento oficial di e linea telefonico 125 atravez di cual lo brinda servicio na e adultonan mayor.

E tema di e proyecto aki ta: “Mi ta inclui” pa e adultonan mayor ta sinti nan mes inclui tambe. E belling aki ta den cooperacion cu Centro Kibrahacha, y nan ta trahando den dje pa un periodo caba. E meta ta pa yuda combati tanto soledad como aislamento, cu ta biba bao di e adultonan mayor. Durante e pandemia di Covid-19 ya caba e Centro Kibrahacha tabata run e linea aki, pa e adultonan mayor cu tabata isola y sinti nan so.

E dignatario a reitera cu awo ta reactiva e linea, pa asina brinda e servicio cu gobierno a priminti, pa asina e adulto mayor sinti su mes mas inclui den e comunidad.

Segun Minister Arends e linea aki ta cuadra cu dos punto: uno, e vision cu e Ministerio di Asuntonan di Adulto Mayor tin di duna y ofrece e cuido adapta, pa adultonan mayor. Di dos ta, brinda e servicio mas accesible na informacion.

“Pues, pa mi ta un gran placer ta akinan pa anuncia e linea pa adulto mayor 125, y mi ta spera cu e linea aki wordo uza tambe. Nos ta cuminza e prome seis lunanan cinco dia pa siman, cu e linea available di 8.30 or di mainta pa 12.30 or di merdia y despues di seis luna nos lo evalua, mirando cu nos tin profesionalnan boluntario, pa atende e linea aki. Despues di seis luna nos lo evalua pa amplia e horario te cu oranan di atardi, y siete dia pa siman”, e dignatario a duna di conoce.