Minister Ursel Arends a firma MOU cu Universidad di Aruba pa traha den colaboracion cu otro

ORANJESTAD (AAN) – “Diabierna ultimo, Ministerio di Transporte, Integridad, Naturaleza y tambe Asuntonan di Hende Mayor, a firma un

“Memorandum of Understanding” (MOU) cu Universidad di Aruba  pa asina nos por cuminza traha mas cerca di otro”, ta palabranan di Minister encarga cu tal cartera, señor Ursel Arends.

E dignatario a splica cu den colaboracion cu Universidad di Aruba, su ministerio por conduci varios estudio pa yuda nan tuma decisionnan, a base di datonan.

“Mi ta sumamente honra y contento cu e posibilidad aki di traha cu Universidad di Aruba y su studiantenan, mirando cu nan por yuda nos fiha e maneho y e futuro di nos Isla. Y netamente esaki ta loke nos ta busca”, e mandatario a bisa. El a agrega cu e prome proyecto cu nan ta bay canaliza cu U.A ta un “white paper”, pa loke ta trata transporte publico, y esaki lo brinda nan datonan den cualnan nan por basa nan maneho pa e añanan siguiente.

“Esaki ta loke nos a priminti comunidad y mi ta honra di por traha hunto cu Universidad di Aruba pa por logra esaki”, e mandatario a subraya.

Minister Ursel Arends a expresa palabranan di danki pa e Rector Viola, e Facultad di Turismo y Maneho, pa e confianza y oportunidad brinda pa nan colabora hunto pa por cambia y introduci maneho na termino largo, pa loke ta trata e futuro di Aruba.