ORANJESTAD (AAN)/Den Haag – Recientemente Minister Plenipotenciario mr. Ady Thijsen a haci un bishita di cortesia na e Embahador di Italia na Hulanda, Giorgio Novello.
Durante di e combersacion minister Thijsen a duna Embahador Novello un bista di e situacion di Aruba na e momento aki despues di e pandemia di Covid. Cu Aruba riba e tereno di turismo a recupera hopi liher y e cifranan ta yegando na e nivel prome cu Covid. Tambe cu e pandemia a mustra cu Aruba mester diversifica su economia y cu Aruba ta sondeando posibilidad pa esaki. Principalmente riba e tereno di hidrogeno tin contactonan cu Hydrogen Valley na Groningen. Un eventual planta hidrogeno por bin na e tereno unda awor tin e refineria y cu por crece y bira lider riba e tereno aki pa e region Caribense. E proyecto di Hydrogen Valley por conta cu hopi sosten financiero for di fondonan di Union Europeo.
Minister Thijsen a sigui bisa cu e pandemia tambe a mustra cu Aruba ta hopi dependiente riba importacion di fruta y berdura. Pesey Aruba ta en busca di maneranan pa amplia e sector di agricultura pa e mercado local pera tambe pa e hotelnan. Un aspecto particular cu Minister Thijsen a menciona, ta cu tin personanan na Aruba cu ta produci biña for di fruta local. Den e caso aki lo ta bon pa mira manera cu e personanan aki por bai Italia – cu ta conoci como un pais di biña – pa por siña mas tocante produccion di biña. Embahador Novello a encanta e idea aki y a bisa cu di su parti elo bai mira kico ta posibel cu e personan aki por sigi un tipo di seminario di biña na regionnan di Italia cu ta conoci pa nan biña. Un iniciativa cu sigur por yuda e sector aki na Aruba.
Siguientemente Embahador Novello a bisa cu - mirando cu e ta Embahador pa henter Reino Hulandes - elo tin plan pa bishita Aruba na luna di october di e aña aki. E bishita aki pa mira y siña mas di Aruba. Un parti particular di su bishita na Aruba ta su interes na e situacion di personanan cu un limitacion. Esaki mirando cu Embahador Novello mes ta den un “scoot mobiel”. Prome cu su bishita pa Aruba, Embahador Novello a bisa Minister Thijsen cu e ta desea pa Aruba tene un presentacion na e Instituto Cultural di Italia na Amsterdam.
Otro tema cu Minister Thijsen a papia cu embahador Novello ta e posibilidad di tene un conferencia di Embahadornan na Aruba. Embahador Novello a haya esaki un bon plan y a bisa cu lo mester forma un grupo di 4 of 5 embahador pa pusha e proyecto aki y convence e otro embahadornan e valor adicional di un conferencia akin a Aruba.
Finalmente Minister Thijsen a gradici Embahador Novello pa e bunita recepcion y cu e cooperacion brinda, principalmente riba e tereno di biña
Potret ta cortesia di Arubahuis
