"Oido y colaboracion cu sindicatonan ta un prioridad"
ORANJESTAD (AAN): Minister di Husticia y Asuntonan Social, Rocco Tjon, a cuminsa cu su reunionnan y diaranson a reuni cu diferente sindicato. Minister Tjon na diferente ocacion durante su trayecto como politico a expresa cu e aspectonan cu tin hopi importancia ta e parti di personal.
“Si bo departamento ta funciona bon y tur aspecto pa personal ta bon regla, mi ta kere e output lo ta hopi mas eficiente”, Minister Tjon a enfatisa.
Diaranson mainta Minister Tjon a reuni cu e sindicato di bomberonan, SIMBA, Sindicato SEPPA y Sindicato TOPA. E sindicatonan a trece nan punto y preocupacionnan padilanti bastante elabora. Reunionnan cu Sindicato SPA y Sindicato STA lo tuma luga proximamente.
Minister Rocco Tjon a remarca cu tur e reunionnan cu e sindicatonan tawata hopi fructifero na unda cu Minister Tjon a haci un apelacion di biaha na e sindicatonan tambe pa nan trece nan puntonan padilanti den un staat notitie pa asina e prioridadnan cu nan a señala por bay forma parti tambe di e meerjarig beliedsplan cu e minister kier introduci pa Ministerio di Husticia y Ministerio di Asuntonan Social. Di biaha tambe, e minister encarga cu e dos carternan aki a palabra cu e sindicatonan cu lo fiha fecha pa sigui reuni.
“Locual tambe nos a palabra mesora ta cu nos ta yega na un structuracion di consulta dus den e caso aki nos a fiha fechanan caba pa dos biaha pa luna nos reuni pasobra mi ta kere cu hunto nos lo percura cu tur e retonan y specialmente e retonan cu ta recarda asuntonan di personal wordo surpasa den un tempo hopi cortico”, Minister Rocco Tjon a duna di conoce
