Wega barata ta culmina na man di Raycond y Miguel Jose - *Raycond a yuda pone Tereno y Husticia den man di acusado Benny - *Miguel Jose ta acepta presencia Benny pero kier hunga cu integridad
ORANJESTAD(AAN)—Kico ta integridad politico y kico ta seriedad den politica na Aruba, a keda demostra ayera ora dos Miembro di Parlamento a duna muestra atrobe di e nivel pober cu lamentablemente ta presente den Parlamento di Aruba.
Ta trata aki di dos supuesto representante di Pueblo di Aruba, cu ta bende nan mes den mundo politico como hende sumamente sabi pero ta duna prueba di un nivel barata den politica.
Raycond di partido AVP, cu a bira popular pa e sombre di intelectual cu cual e ta tapa su cabez for di luz di solo, a considera necesario pa cuestiona e concepto di integridad di Prome Ministro Evelyn Wever-Croes.
Raycond a haci wega cu e hecho cu Prome Ministro Evelyn Wever-Croes no a acepta pa Rocco Tjon ta Ministro di Husticia mientras su esposa ta dirigi Cuerpo di Polis na Aruba mientras si a nombra Endy Croes como Ministro di Deporte siendo cu e tin un caso civil contra Lotto pa Deporte.
Segun e palabranan di Raycond, ningun persona cu ta ocupa e puesto di Ministro por tin un caso civil pendiente cu un organisacion of departamento cu ta resorta bou nan maneho.
Teniendo cuenta cu e titulonan academico di Raycond ta papia di un estudio avansa cu e mester a sigui, mester conclui aki cu Raycond a baha su mes na un nivel politico hopi abou.
Hamas Aruba por permiti pa tin un Ministro di Husticia, cu ta esposo di e persona cu ta dirigi e Cuerpo di Polis. Cu otro palabra, pareha Tjon mester a dicidi si Rocco ta bira Ministro di Husticia y su esposa ta baha como Alto Comisario of cu su esposa ta keda Alto Comisario y Rocco Tjon no ta bira Ministro.
Ta mas cu claro cu un Prome Ministro no por dicidi kico un pareha ta haci den un situacion cu sigur tin un conflicto pasobra Ministro di Husticia ta responsabel pa e maneho di Husticia y Polis y democracia no ta permiti pa su esposa ta na cabez di Cuerpo Policial.
Ta dificil pa asumi cu Prome Ministro Evelyn Wever-Croes a “hands up” pareha Tjon pa Rocco Tjon bira ministro y su esposa bandona e puesto di Alto Comisario.
Loke mas ta resalta den e situacion aki ta e hecho cu Raycond no tin ningun problema cu e ta parti di e fraccion di AVP, cu ta exigi Aruba acepta Benny Sevinger como Miembro di Parlamento, caminda e ta dicidi pa asuntonan di tereno di Aruba mientras e tabata den detencion preventivo (cu a wordo suspendi pues no elimina) pa motibonan di tereno cu a haci cu e tabata den prison na momento di eleccion.
Pa prome bez den historia un persona den prison pa motibonan di tereno tabata riba lista politico y mester a spera te ora Huez Comisario a bisa cu ta suspende su detencion den prison, pa e por a drenta Parlamento.
Nunca Rycond a expresa su mes contra e presencia di Benny Sevinger den Parlamento. Es mas, fraccion di AVP na cual Rycond ta pertenece a haci cu Benny Sevinger como Miembro di Parlamento ta dicidi pa asuntonan di tereno y pa Husticia, caminda su caso ta pendiente y mientras ainda e ta persigui pa Ministerio Publico como sospechoso mayor.
Di su parti e nobato den politica, Miguel Jose Mansur, ta hunga politica cu resultadonan di screening y informacion riba e personanan cu a bira Ministro.
Miguel Jose Mansur ta den un situacion exclusivo di Parlamento, ya cu na momento cu e no por continua cu su trabou, Accion 21 mester bandona Parlamento ya cu e propio candidatonan riba lista di Accion 21, cu mester sigui Miguel Jose directamente a bandona su persona na momento practicamente cu eleccion a termina.
Miguel Jose Mansur no por conta asina ni cu seriedad di parti di personanan cu a sostene su persona ora el a drenta politica, caminda te awe e mester demostra un calidad di nivel aceptabel, cu aparentemente e tin problema pa alcansa.
Miguel Jose Mansur no tin ningun problema cu presencia di Benny Sevinger, cu ta parti di oposicion, pero cu su cuestionamento di Ministronan cu a pasa screening, ta duna claramente indicacion di ta un nobato sin nivel necesario pa conduci Aruba na un miho futuro.
Na forma critico DIARIO lo sigui loke ta pasa den Parlamento, caminda placa di un Pueblo cu ta pasa den un crisis historico ta wordo paga na hende cu aparentemente ta kere cu nan “titulonan” entre otro mester haci nan idolo, mientras nan ta sostene pa un persona suspendi di detencion preventivo, manera Benny Sevinger, como Miembro di Parlamento ta dicidi pa terenonan y pa husticia na Aruba.
