Minister Maduro a splica riba Aruba su Peso Fiscal cu ta mas abao cu e promedio den region

Durante tratamento di Presupuesto Supletorio 2024:

ORANJESTAD (AAN): Durante e tratamento di e prome Presupuesto Supletorio pa aña 2024, un Parlamentario di oposicion a lansa e critica den direccion di Minister Maduro di Finansa cu na Aruba e peso fiscal ta halto. Sinembargo e Parlamentario no por a mustra informacion di unda e ta saca e conclusion aki. Esaki a pone cu den su contestacion Minister Maduro a tuma tempo pa demostra cu cifranan real, cu e peso fiscal di Aruba compara cu e paisnan den region no ta asina halto.

   Peso fiscal na Aruba: Minister Maduro a splica cu na Aruba e peso fiscal den aña 2024 ta na 20,4%. Por mira cu esaki ta na e nivel di aña 2019 cu ta prome cu e pandemia.

   Durante e pandemia e peso fiscal a baha na Aruba na 20%, 17,7% y 19,4%, ya cu Gobierno a duna Alivio Fiscal 1 y 2 cu a yuda baha e peso fiscal den añanan 2020, 2021 y 2022. Compara cu aña 2023, por mira un rebaho den e peso fiscal den aña 2024.

   Peso fiscal na Latino America y Caribe: E mandatario a sigui splica cu OECD cu ta e autoridad riba tereno fiscal internacional, a publica cu pa aña 2024 e peso fiscal pa paisnan den e region Latino Americano y den Caribe, ta na un promedio di 21,5%.

   Esaki ta demostra cu e peso fiscal di Aruba cu ta rond di 20%, ta cay bou di e promedio di peso fiscal den nos region. Pues Aruba su peso fiscal no ta asina halto manera e Parlamentario ta critica.

   Peso fiscal Hulanda y paisnan Europeo: Pa por tin un bista con e peso fiscal ta na Hulanda y otro Paisnan Europeo manera Dinamarca cu ta conoci pa tin bon areglonan social, bon cuido medico, bon infrastructura, bon sistema di educacion, e peso fiscal promedio ta na 34,6%. Esaki ta un indicacion, cu mas servicio di Gobierno, ta traduci su mes den un peso fiscal mas grandi na e pais.

    Parlamentario mester busca bon informacion prome cu critica: Minister Maduro ta enfatisa cu ta importante pa un Parlamentario cu kier cuestiona of lansa critica cu por atacha e bon nomber di Aruba, busca bon informacion prome. No djies papia pa papia of grita pa grita, sino haci e trabao Parlamentario di busca informacion relevante pa informa Pueblo corectamente.

   Na Aruba no ta mata hende cu belasting. E peso fiscal di Aruba ta bou di e promedio di e paisnan den nos region.