Minister Geoffrey Wever a reuni cu United Nations Development Programme

A intercambia over e implementacion di e SDG framework di Nacionnan Uni na Aruba

ORANJESTAD (AAN): Diahuebs 24 november, Minister di Asuntonan Economico, Comunicacion y Desaroyo Sostenibel, mr. Geoffrey Wever, a reuni cu sr. Gerardo Noto, Resident Representative a.i. di United Nations Development program (UNDP) pa Aruba, Corsou, Sint Maarten y Trinidad and Tobago. E topiconan di e reunion tabata e Faculty SISSTEM di Universidad di Aruba y implementacion di e Sustainable Development Goals (SDGs).

            Minister Geoffrey Wever ta Territorial Authorizing Officer di Aruba den cual Minister Wever tin e encargo y responsabilidad pa e administracion di proyectonan cu Union Europeo y proyectonan regional. Den cuadro di esaki Aruba ta den preparacion pa expande e Faculty of Sustainable Island Solutions through Science, Technology, Engineering and Math (SISSTEM) di Universidad di Aruba cu fondonan di Union Europeo atraves di e “11th European Development Fund”. UNDP hunto cu Katholieke Universiteit Leuven tambe ta partner den e proyecto grandi aki.

            Minister Geoffrey Wever, como minister di Desaroyo Sostenibel, y UNDP como parti di Nacionnan Uni, a intercambia over e implementacion di e SDG framework di Nacionnan Uni na Aruba. E SDG framework ta enfatisa e importancia di long-term planning y di partnerships strategico den e proceso aki pa por logra e metanan. Cada pais tin su propio retonan di desaroyo sostenibel pa traha riba dje. Esey ta wordo yama “localization of SDGs”, e SDGs mester wordo traduci na e necesidadnan nacional di e pais.

            “Mi ta contento cu e partnership cu nos tin cu UNDP. Ta importante pa un pais tin partnerships fuerte local como tambe internacionalmente pa asina logra avansa metanan comun”, Minister Wever a comenta.