Minister di Cultura a ricibi bishita di e artista Gilbert Senchi y ARTiosa

ORANJESTAD (AAN): Siman pasa Minister di Cultura, Xiomara Maduro a haya bishita di e artista Arubiano di renombre internacional señor Gilbert Senchi,

kende presenta e mandatario su catalogo di obranan di arte cu a keda comiciona local y internacionalmente.

Señor Senchi ta conoci pa su obranan di arte publico na Aruba, manera Lolita y Monumento pa Piscadornan Perdi, pero su catalogo ta yena di obranan cu ta exponi den exterior. Señor Senchi a splica tambe mas di e obra publico Driekel destina pa Aruba, pero cu interes internacional pa e obra den otro continente.

Den tapara tambe tin un obra pa Oranjestad pa cual ta trahando ainda riba e detaye.

Aruba por ta orguyoso di e talento di señor Senchi, Minister Xiomara Maduro ta gradici Senchi y señora Mirla Passchier di ARTiosa pa e bishita y splicacion amplio di e obranan di arte di nos talento local di renombre internacional. Aruba ta keda pendiente pa por admira mas obra di e man talentoso di Gilbert Senchi.